Претседателот на Владата на Република Македонија, Зоран Заев, денеска учествуваше и се обрати на Свечената академија на Регионалната конференција „Зајакнување на квалитетот на правдата во светло на правосудната реформа“.
На дводневната Регионална конференција која по повод Денот на правосудството, ја организираше Здружението на судиите, со поддршка на Мисијата на ОБСЕ во Скопје, присуствуваа министри, амбасадори и претставници на правосудството.
„Апсолутно сум застапник на концептот за почитување на интегритетот на судиите и за нивната самостојност и независност. Тие самите, низ својата пракса да ги препознаваат можностите за нивно усовршување, како и да ги препознаваат застранувањата и за нив да разговараат и да ги отстрануваат со помош на механизмите внатре во правосудниот систем“, истакна премиерот Заев во своето обраѓање.
Заев, кој воедно е и претседател на Советот за следење на имплементацијата на реформите во правосудството додаде дека граѓаните очекуваат, судиите да ги исполнуваат високите стандарди на интегритет, независност и непристрасност.
„Нагласувајќи ја исклучителната важност на реформите во правосудството“, премиерот Заев рече дека актуелната Влада е посветена на спроведување на суштинските реформи во овој сектор, со цел враќање на довербата на граѓаните во правосудниот систем како и подобрување на пристапот до правда за сите граѓани и целосно владеење на правото.
„Оваа 2018 година ќе биде година на најважните правосудни реформи откако Македонија е држава кандидатка за членство во ЕУ. Стратегијата беше направена врз основа на темелни консултации со сите релевантни чинители и со целосна поддршка од ЕУ. Здружението на судии беше активно вклучено и даде вреден придонес“, истакна Заев, истакнувајќи дека со цел кредибилни правосудни реформи се води и активен дијалог со опозицијата во Собранието за постигнување на политички договор за законите од областа на правосудството.
На крајот од своето обраќање тој истакна дека освен изработувањето на законите, многу е важно тие да се применуваат доследно и во интерес владеењето на правото и во интерес на граѓаните за чија јавна доверба сите институции постојано треба да се борат.
ЦМ