„Горд сум што во првиот изборен круг имавме кристално чисти избори заради тоа што само преку фер, слободни и демократски избори сите победуваме во Македонија. Такви избори треба да имаме и в недела“, порача лидерот на СДСМ Зоран Заев, по вчерашната средба со претседателот на ДУИ Али Ахмети и кандидатката за градоначалник на Тетово, Теута Арифи, јавува МИА.
„Денеска сме овде за поддршка на актуелната и идната градоначалничка на Тетово, Теута Арифи. Заедно, како коалициски партнери, уште пред првиот круг кога ја објавивме нашата коалиција за локалните избори, даваме меѓусебна поддршка и веруваме во иднината на Македонија. Ова што го правиме е вредно за почит. Веројатно, првпат во самостојна Македонија се случува уште пред изборите да се склучат коалиции на многу транспарентен начин. Чесно, отворено, транспарентно ја побаравме подршката и јас и од овде сакам да ја побарам подршката од граѓаните на Тетово за Теута Арифи“, изјави Заев по завршувањето на средбата.
Тоj посочи дека Арифи е една од ретките жени на оваа функција и додаде дека верува оти Тетово под нејзино раководство и со поддршка од централната власт, ќе има одлични перспективи во периодот што следи.
Ахмети порача дека постојано работеле и се ангажирале за демократските процеси и затоа, додаде, истите стандарди да се применат и на 29 октомври затоа што тоа е многу значајно за нашата заедничка иднина.
„Заеднички анализиравме и меѓусебно се информираме околу почитувањето на предизборниот договор. Споделивме мислења дека договрот функционираше нивоа. Разговаравме и за важни теми што не очекуваат по изборите затоа што кампањата е толку динамична што ние двајца се среќававме првпат откако го постигнавме договорот пред изборите“, изјави Ахмети и посочи дека целиот договор бил спроведен од органите на двете партии и нивните изборни штабови.
На новинарско прашање дали ги коментирале и односите во владината коалиција, Заев истакна дека разговарале да се погрижат пред се како власт, изборите да бидат регуларни, фер, демократски и слободни и оти тоа е приоритет на сите.
„Навистина не навлегуваме во коалициите, иако имаме поприлично незгодна состојба, со еден од коалициските партнери. Тоа е негово право, локални избори се. Локалните избори се различни од парламентарните избори, и оставаме секој на својата одговорност“, оцени Заев.
Тој посочи дека коалицијата со ДУИ ја објавиле уште пред изборите.
„Во првиот изборен круг гледате дека оставивме во Струга, во Гостивар граѓаните да го кажат својот правец. Еве ги кандидатите во вториот изборен круг. Зијадин Села одлучи да влезе во коалиција со Беса, го гледам некаде и со ВМРО-ДПМНЕ, тоа е негово право. Секако, тој си носи одговорност и пред своите гласачи“, рече Заев, известува МИА.
Лидерот на СДСМ рече оти коалицијата со ДУИ ја направиле уште пред самата кампања, и стојат на тоа транспарентно, отворено, затоа што веруваат во заедничката иднина, пред се, како што рече, за сите граѓани на Македонија.
„ Секако веруваме и во она што ја чека Република Македонија. Време на сериозни одлуки, време на сплотеност, време на единство и време на работење во интерес на сите граѓани“, посочи лидерот на СДСМ.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.