Украинскиот претседател Володимир Зеленски вечерва преку Зум им се обрати на демонстрантите собрани во голем број европски градови, кои излегоа на улиците за да ја поддржат Украина во борбата против руската инвазија, пренесе МИА.
– Првата минута од ова обраќање ќе биде минута молк за сите оние кои загинаа во борбата за својата земја, за нашите војници, за сите оние кои прават херојски дела бранејќи ја нашата земја, за оние кои ги дадоа своите животи, изјави Зеленски во неговото обраќање до демонстрантите во Братислава, Франкфурт, Прага, Лион, Тбилиси, Виена и Вилнус.
– Им посакувам се најдобро на народите во Европа. Нашите војници, нашите херои, овие денови ја штитат нашата Украина, нашата Европа и вашата Европа, додаде Зеленски.
Зеленски го искористи последниот дел од своето обраќање за да вети победа во војната, која ја нарече „победа на Украина и победа на демократијата“.
– Сакам да ве повикам да не молчите. Сакам да излезете на улиците на вашите градови и да ја поддржите Украина, да го поддржите нашиот напредок и нашата борба, бидејќи ако Украина падне, и Европа ќе падне. Ако ние паднеме, ќе паднете и вие, затоа немојте да молчите и не ја вртете главата, истакна украинскиот претседател.
– Излезете и поддржете ја Украина колку што можете повеќе. Ако победиме, а сигурен сум дека ќе победиме, тоа ќе биде победа за целиот демократски свет. Тоа ќе биде победа за нашата слобода. Тоа ќе биде победа на светлината над темнината, слободата над ропството. Ако победиме, ќе напредуваме како Европа, а Европа ќе напредува повеќе од кога било по таа славна победа. Слава на Украина, заклучи Зеленски.
