На денешната прес-конференција министерот за економија Крешник Бектеши информираше за спроведениот јавен повик за субвенциониран годишен одмор за работници со ниски примања.
На повикот одговориле 1.900 и работници, 1.300 работници ги исполниле условите и добиле ваучери за субвенциониран годишен одмор. Бидејќи од предвидените 30 милиони денари, со оваа бројка на пријавени работници ќе бидат потрошени само 20 милиони денари ќе се објави уште еден повик кон крајот на август.
Единствен услов за добивање поддршка за годишен одмор е семејството на работникот кој аплицира, да нема месечни приходи поголеми од 22.000 денари.
„Првиот повик покажа дека интересот за субвенциониран годишен одмор е зголемен за 68 отсто. Работниците може да ги користат ваучерите во еден од 30-те хотели со кои имаме потпишано меморандуми за соработка и зависно од цената на аранжамните, да престојуваат кај нив, два, три или седум дена“, истакна Бектеши.
Бектеши истакна дека оваа мерка има две важни цели во полза на граѓаните, првата е по принципот „парите кај граѓаните“ да им се помогне на семејствата на работниците со ниски примања, со поддршка од државата да го искористат своето елементарно право на годишен одмор, и втората истовремено да им се обезбеди поддршка на хотелиерите, односно угостителската дејност во зголемување на обемот на работа надвор од туристичката сезона, а со тоа да се помогне развојот на домашниот туризам во земјава.
Б.Ј.