Викенд во Македонија, 2-3 февруари 2019
Нова епизода со Груевски на ТВ Сител
Груевски даде интервју за својата омилена телевизија Сител, настан што веројатно беше најкоментиран во текот на викендот. СДСМ му порача дека ќе се врати, но в затвор.
„Апсолутно имам намера еден ден да се вратам во Македонија. Тука сум да се засолнам од политичкиот прогон, откако увидов дека сите апсурди се надминати и дека властите имаат намера да одат до крај. Јас во Македонија бев осуден за работи за кои, во земји членки на ЕУ, судски случаи воопшто не би биле покренати“ – рече тој во краткото интервју за Сител.
Се јави и обвинителството, ветувајќи дека, конечно, ќе излезе со резултатите од истрагата за бегството на осудениот екс-премиер.
Интервјуто со Груевски го коментираа повеќе колумнисти и аналитичари. На таа тема за ЦИВИЛ МЕДИА пишуваат Џабир Дерала и Сашо Орданоски.
Амди Кока Кола Бајрам ќе се трка за претседател на Македонија
Претседателските избори нема да бидат лишени од хумор и сатира, а во тоа многу ќе помогне најновиот претседателски кандидат, Амди Бајрам. Тој не испушти уште еднаш да се спореди себеси со Кока Кола, за што компанијата веројатно ќе мора да преземе и правни чекори за заштита на имиџот на еден од најпопуларните пијалоци во светот.
Бачев контра Македонија
Политичкиот циркусант Јанко Бачев објави дека ќе побара од Унгарија и Турција да не го потпишуваат Протоколот за прием на Македонија во НАТО. Нема што да се додаде на оваа вест.
Бришење долгови за струја и реакции
Владата изрази волја да избрише долгови на граѓаните за сметките за струја во износ од 110 милиони евра. Сѐ што е неплатено по овој основ до 2006 година, во договор со ЕВН и ЕЛЕМ ќе се брише како долг на име на граѓаните. Ова го соопшти премиерот Заев, велејќи дека 220.000 граѓани заглавиле во долгови кон овие компании.
Јавноста остро го нападна овој план во кој препозна двојни аршини и популизам…
Премиерот: „Ќе нѐ биде“
„Изминатава година ја завршивме со 5,6% покачување на просечната плата. Тргна работата. Многу скоро ќе станеме дел од НАТО – безбедна држава, со стабилизирана економија. Овие факти, како и посветената економска политика, за година и пол донесе 17 нови странски инвестиции, кои во финалната фаза ќе вработуваат повеќе од 4.000 луѓе. Ќе нѐ биде!“ – напиша премиерот Зоран Заев на својот Фејсбук профил.
Јавни интервјуа за членови на Антикорупциска
Започнаа јавните интервјуа со 57-те кандидати за членови и претседател на Државната комисија за спречување на корупцијата. По десетмесечна пауза, по скандалите и оставките на претходното раководство, кога функционираше само Секретаријатот на ДКСК, се прават забрзани подготовки оваа државна институција конечно да профункционира во целосен состав.
ЦИВИЛ посвети големо внимание на анализи и препораки за изгледот и функционирањето на новата ДКСК, а ја организираше и конференцијата „За општество ослободено од корупцијата“ во декември 2018, кога беше издадена и публикацијата „Антикорупција“.
Мицкоски сѐ уште се фали дека е подготвен да биде премиер
Во меѓувреме, продолжуваат безброј повторените закани на Христијан Мицкоски (ВМРО-ДПМНЕ) за тоа што ќе направел кога ќе „победат на предвремени парламентарни избори“. Тој, во интервју за Радио Слободна Европа, уште еднаш се пофали дека е подготвен да биде премиер. За нијанса ја смирува својата реторитка против Преспанскиот договор, но кажа дека ќе сторел сѐ што е во негова моќ да ги смени процесите.
„Инсистираме на предвремени парламентарни избори, бидејќи Зоран Заев сака да ги украде претседателските избори. Доказ за тоа е што не се процесирани нашите забелешките за нерегуларностите за време на референдумот“ – изјави Мицкоски за РСЕ.
***
Земја што има ваков викенд, не мора да се грижи за забавата во текот на работната недела.
Џ. Дерала
