ТЕМА НА ДЕНОТ
Денот на Европа – сидро на стабилноста наспроти Путиновата пропаганда
Со доаѓањето на Владимир Путин на власт во 2000 година, воената парада во Москва по повод Денот на победата 9 Мај се користи како клучен елемент на неговата домашна пропаганда, зајакнување на „патриотизмот“, глорифицирање на руската војска и да ја мобилизира јавноста пред западната „закана“ за Русија. Како што јавуваат агенциите, на парадата оваа година учествуваа околу 10.000 воени лица, вклучувајќи војници од многу други земји, како и руски воен персонал кој се борел во Украина.
Парада на срамот и злосторството: Руските агресори не се ослободители, туку злосторници – ја присвојуваат победата над нацизмот
Од Амбасадата на Украина велат дека Русија повторно ќе организира парада, која со години не служи толку за оддавање почит на жртвите од Втората светска војна, колку што е алатка за пропаганда. Дури и најавата за тридневен прекин на огнот покажува дека за Москва се поважни парадите и милитантната пропаганда отколку зачувувањето на човечки животи и обновата на мирот.
Дури и во време на глобална несигурност, Европа останува сидро на стабилноста во еден свет што се менува
Денес, 75 години по објавувањето на Шумановата декларација, Европа е повеќе од Унија, таа е наш дом и можеме да бидеме горди на неа, порача претседателката на Европската комисија, Урсула фон дер Лајен во видео порака по повод Денот на Европа – 9 мај.
– Пред точно 75 години, еден визионерски лидер предложи Шумановата декларација да биде првиот чекор кон нашата Европска Унија и тоа беше почеток на најдолгата ера на мир во нашата историја, истакна Фон дер Лајен.
Ден на Европа: Зачетоци, формирање, значење и одбележување
Низ Европа, но и во светот, денеска се одбележува Денот на Европа, ден што ги слави „мирот и единството во Европа“, прославен на 5 мај од страна на Советот на Европа и на 9 мај од Европската Унија.
Првото признание за Денот на Европа го направи Советот на Европа, воведен во 1964 година Европската Унија подоцна почна да го слави својот Европски ден во спомен на Шумановата декларација од 1950 година, во која првпат беше предложена Европската заедница за јаглен и челик, што доведе до тоа некои да го наречат „Ден на Шуман“ или „Ден на обединета Европа“. И двата дена се слават со истакнување на знамето на Европа.
Историски факти: Западот наспроти Истокот, два датума, една победа над фашизмот
Денот на победата во Европа е денот кога се одбележува формалното прифаќање од страна на Сојузниците во Втората светска војна на безусловната капитулација на германските вооружени сили на 8 мај 1945 година (вторник); го означи официјалното завршување на сите германски воени операции.
Повеќето поранешни советски земји, како и некои други, го слават овој ден на 9 мај, бидејќи безусловната капитулација на Германија стапи на сила во 23:01 часот на 8 мај според средноевропско летно време, што одговара на 00:01 часот на 9 мај по московско време.
Неколку земји секоја година го одбележуваат овој ден како државен празник, кој исто така се нарекува Ден на победата над фашизмот, Ден на ослободувањето или Ден на победата. Во Обединетото Кралство, денот често се скратува како VE Day, кратенка што постои уште од септември 1944 година, во очекување на победата.
ИЗЈАВА НА ДЕНОТ
Млад кочанчанец залепен со селотејп на бандера на плоштадот „Македонија“ во Скопје, како што самиот нагласи дека е симболично врзан, денеска побара од институциите да им помогнат на повредените од дискотеката „Пулс“ во Кочани.
💬 Симбол на врзани раце на еден народ, на заглавените институции, на систем што заборава побрзо отколку што гасне пожар ‼️#Кочани сè уште боли. pic.twitter.com/YIxvRFdVMd
— Support Kocani (@SupportKocani) May 9, 2025
-Пред некој ден дома си дојдоа деца од болница без прсти на рацете. Дајте барем на тие деца да им се помогне, порача Мартин Кироски на кого во дискотеката му загинале петмина другари.
РЕГИОН
(ИЗБОР) Албански медиуми: Косово се соочува со политичка криза и санкции од ЕУ; Албанија два дена пред парламентарни избори; Рама најави отворање на третото поглавје
Додека Албанија го отвора третото поглавје во преговорите за членство во ЕУ, Косово се соочува со политичка криза и санкции од Европската Унија, пишуваат албанските и косовските медиуми.
Албанија е пред самиот почеток на парламентарните избори, а во Косово ниту по тринаесеттиот обид, не се конституира собранието.
СВЕТ
Велика Британија денеска објави нов пакет санкции против Русија, вклучувајќи замрзнување на имотот на повеќе директори на нафтената трговска компанија „Coral Energy Group“, која сега е позната како „2Rivers Group“.
(НЕ)БЕЗБЕДНОСТ
Дваесет и пет годишниот Е.О, странски државјанин, е убиен синоќа во угостителскиот објект „Вами“ на Градскиот плоштад во Штип. Во болницата е донесен без знаци на живот, со неколку прострелни рани. Лекарите пробувале да го реанимираат, но обидите биле несупешни.
По преземени мерки и активности, при што бил употребен и дрон, полицијата во близина на наплатна рампа Миладиновци, од слобода ги лишиле К.К.(21) од Република Турција зa кој постои сомнение дека е сторител на синоќешното убиство во Штип, како и А.Х.(22), Т.М.(22), О.М.(29) и А.О.(28), сите од Република Турција, поради сомнение дека му помогнале на К.К. да побегне од местото, соопштија од МВР.
СЛОБОДНА ЗОНА
„Исламот, во свеста на современите Македонците, доминантно не се поврзува со историското наследство, или пак со Турците или Бошњаците, кај нас, туку речиси исклучиво со Албанците. Иако и тие, како и Македонците, кои се и католици, протестанти и муслимани, се и католици и православни. Но, нивниот втор “грев”, покрај тоа што се Албанци, е и што се (и) муслимани“, пишува Никица Корубин во коментарот „(Де)исламизирана албанофобија“.
*
„Да, мајките на 62 главно деца пред неполни два месеци ги пуштиле децата во диско клуб во Кочани и … треба ли да му се кажува на премиерот што се случило на 16 април? Има ли некаков бришач на меморијата во неговата глава кој ги прави исчезнати и такви крупни настани за кои пишуваше целиот светски печат!? Зошто тогаш бараме оставки кога ги нема во сеќавањата за таков шокантен настан од кои останаа и 200 лица над чие здравје ќе се тресеме целиот нивни живот, во текот на нивната младост, секако. Да, нивните мајки нема да ги пуштат на улица, нема да можат и да сакаат. Какво отсуство на сочувство, а ако тоа го нема за ваков настан, зошто би ги имало во другите сфери? Можно ли е без тоа чувство да се води држава, бидејќи политиката единствена цел треба да ги има – граѓаните и нивните потреби и чувството на безбедност!“, пишува Љубомир Костовски во коментарот „Мицковски и неговите говори: Просто да ти е милина што сме „скандинавска земја““.
Д. Муратов
