Денес, на 8 мај, Украина и светот ја одбележуваат 80-годишнината од победата над нацизмот во Втората светска војна 1939–1945 година. Победа која ги постави темелите на современиот светски поредок и на развојот на човештвото.
Таа крвава војна однесе милиони човечки животи, скрши милиони судбини и разори милиони семејства. Се чинеше дека нејзините ужасни последици ќе бидат трајна лекција за идните генерации – гаранција за она што секоја година го повторуваме во овие денови: „Никогаш повеќе!“
Генерацијата на победници, благодарение на која беше обезбеден мирот на планетата, беше убедена дека нејзините потомци ќе живеат во мирен и безбеден свет. Сите народи на поранешниот СССР и државите-сојузнички на антихитлеровската коалиција дадоа непроценлив придонес во победата над нацизмот заради среќна и мирна иднина на идните генерации.
Денес сме сведоци на тоа како Руската Федерација, почнувајќи досега невидена во Европа по Втората светска војна целосна агресивна војна, се обидува да ја присвои победата над нацизмот. Кремљ тврди дека Русија ја победила Втората светска војна самостојно, без сојузници и без придонес на други народи, и настојува да ја монополизира заедничката победа над Хитлер. Како Русија да била единствената што имала клучна улога и што поднела најголеми загуби. А всушност, најголемите човечки и материјални загуби во таа војна ги претрпеа не Русија, туку државите и народите кои се најдоа помеѓу неа и Германија – пред сѐ украинскиот народ.
Важно е да се потсетиме и дека ослободувањето на Европа од нацизмот не донесе слобода за многу европски народи. По завршувањето на Втората светска војна, сталинистичкиот режим ја окупираше Источна и Централна Европа. Советскиот режим изврши бројни злосторства: потиснување на националниот идентитет, репресии, депортации во Сибир врз основа на лажни обвиненија, прекршување на човековите права, ограничување на слободата на совеста и други основни слободи. Сите овие злосторства мора соодветно да бидат осудени.
За разлика од Украина, САД, Велика Британија, Франција и други држави во светот, кои вложуваат напори за зачувување на мирот, денешна Русија не само што не извлече поука од минатото, туку го прифати слоганот „Можеме да го повториме“, а нејзина идеологија стана милитаризмот и неоимперијализмот.
Истакнувајќи ја својата наводна исклучителна улога во победата над нацизмот, Кремљ се обидува да го одврати вниманието од своите злосторства – како оние во минатото, така и во тековната агресивна војна против Украина.
Утре, на 9 мај, Русија повторно ќе организира парада, која со години не служи толку за оддавање почит на жртвите од Втората светска војна, колку што е алатка за пропаганда. Дури и најавата за тридневен прекин на огнот покажува дека за Москва се поважни парадите и милитантната пропаганда отколку зачувувањето на човечки животи и обновата на мирот.
Руската нечовечка фигура што ќе го прифати парадниот строј нема ништо заедничко со победата над нацизмот. Тоа е воен злосторник, за кого Меѓународниот кривичен суд има издадено налог за апсење. Руските војници што ќе маршираат пред него, исто така не се ослободители од нацизмот – тие се окупатори, воени злосторници, грабежливци, силувачи и убијци.
Всушност, парадата на Путин на 9 мај ќе ја прославува не победата над нацистичка Германија, туку современата фашистичка Русија.
Го повикуваме меѓународното заедништво да не ѝ дозволи на Русија да го разруши светскиот поредок заснован на почитување на меѓународното право, што беше изграден благодарение на заедничката победа над нацизмот во Втората светска војна.
Ги повикуваме партнерите да ги здружат напорите за засилување на притисокот врз државата-агресор, со цел да се принуди Русија да ја прекине својата агресивна војна против Украина и да се воспостави сеопфатен, праведен и одржлив мир за Украина и цела Европа – на основа на почитување на меѓународното право, Повелбата на ОН и Завршниот акт од Хелсинки.
Амбасада на Украина
