Украина утре ќе биде домаќин на средба на лидерите на таканаречената „Коалиција на подготвените“, изјави украинскиот претседател Володимир Зеленски.
Коалицијата, формирана претходно оваа година и предводена од Франција и Велика Британија, е израз на растечката загриженост кај Европејците дека САД повеќе не претставуваат значајна поддршка за Украина во нејзината тригодишна борба против целосната руска инвазија.
– Ни треба оваа коалиција и таа мора да биде доволно силна за да обезбеди безбедност во согласност со нашата заедничка визија, рече Зеленски во видео обраќање, објавено од неговата канцеларија.
Украина се стреми кон јасни безбедносни гаранции од сојузниците за заштита на земјата од можни руски воени акции во иднина. Коалицијата размислува за можноста да распореди ограничен странски контингент во Украина како дел од можните гаранции.
Зеленски вчера изјави дека во телефонски разговор му кажал на американскиот претседател Доналд Трамп дека 30-дневното примирје е „реален показател“ за напредок кон мир со Русија и дека Кијив е подготвен веднаш да го спроведе.
Трамп го предложи 30-дневното примирје во март, а Украина го прифати, но Русија изјави дека таква мерка може да стапи на сила само откако ќе бидат воведени сигурни механизми за надзор и почитување на примирјето.
Зеленски не прецизираше кои лидери ќе бидат утре во Кијив на средбата на коалицијата, но новиот германски канцелар Фридрих Мерц изјави дека наскоро планира да ја посети Украина.
