По повод обележувањето на две години од крвавиот 9 мај, во населбата Диво насеље во Куманово, ЦИВИЛ – Центар за слобода повторно ги повика институциите и политичките субјекти од земјата на одговорност и транспарентно и објективно расчистување на случајот.
ЦИВИЛ повторно изрази сочувство и поддршка за семејствата на загинатите полицајци и за сите засегнати и погодени од оваа трагедија.
„По повод овој трагичен настан, ЦИВИЛ истакнува дека живееме во една иронична ситуација. Една од придобивките од авторитарното владеење на Груевски е тоа што ги одржа граѓанките и граѓаните од сите заедници во Република Македонија заедно, сплотени во стремежот кон слобода, правда и демократија. Револтот и стремежот кон демократија е она што ги спои сите заедници“, се вели во соопштението.
ЦИВИЛ констатира дека наспроти континуираната систематска операција да се внесе раздор и етнички тензии и на тој начин да се владее со страв, закани и насилство, гледаме едно созревање на граѓанството во Република Македонија. Македонското општество созреа, како на политички, така и на општествен план, разви политичка култура која му даде нов квалитет на живеењето во земјата, сметаат во ЦИВИЛ.
„Ниту политичките партии, ниту институциите кои се подолго време заробени од до скоро владејачките партии, не придонесоа за политичката зрелост на граѓанките и граѓаните на Република Македонија. Токму граѓанките и граѓаните се носителите на стабилизирањето на меѓуетничките односи. Тие се хероините и хероите на враќањето на слободата и демократијата во земјата“, се вели во соопштението.
„Патот кон слободна и демократска Македонија е долг и трнлив, и бара многу напори и жртвувања, но тоа неминовно ќе се случи. Слободоумните и продемократски сили, политички свесните граѓанки и граѓани на Македонија, го најдоа својот пат од кој нема откажување.
На овој ден го победивме фашизмот во 1945 година. Ќе го победиме и овој денешниов! Среќен 9 Мај!“