Наместо тоа да бидат учениците, политичарите и градоначалниците не ја пропуштија можноста да бидат главни „фаци“ на првиот училиштен ден. Во изминатиот период граѓан(к)ите се сведоци дека (не)официјално започна политичката изборна кампања за локалните избори што ќе се одржат на 15 октомври.
Градоначалникот на Град Скопје, Коце Трајановски, кој најави дека по трет пат ќе ја бара поддршката на граѓан(к)ите да биде прв човек на градот, денеска го посети СУГС „Раде Јовчевски-Корчагин“. Тој на учениците им посака добредојде во училиштето, успех во учењето и во совладувањето на наставните содржини и многу убави спомени од средношколските клупи.
Во основно училиште „Петар Поп Арсов“, присуствуваше градоначалникот на Општина Карпош, Стевчо Јакимовски, кој повторно ќе ја бара поддршката од карпошчан(к)и на локалните избори.
„Општина Карпош продолжува со поддршката на учениците. Тоа значи дека основците од прво до петто одделение ќе добиваат бесплатни ужини, а сите ученици ќе посетуваат бесплатни еднодневни екскурзии. Тоа е нашата поддршка од страна на локалната самоуправа кон семејниот буџет на родителите, со што се обидуваме да го изедначиме стандардот кај сите ученици“, додаде Јакимовски.
И градоначалникот на Општина Илинден, Жика Стојановски ги посети основните училиште „Гоце Делчев“, „Ристо Крле“ и „Браќа Миладиновци“, како и Средното општинско стручно училиште „Илинден“.
Политичката партија на Социјалдемократскиот сојуз на Македонија преку соопштение ја критикуваше погрешната образовна политика на претходната власт.
„Владата предводена од СДСМ ги санира штетите во образованието што зад себе ги остави криминалното и расипничко владеење на ВМРО-ДПМНЕ. Се преиспитуваат образовните програми што се донесени присилно и без расправа, а ќе се ревидираат и сите спорни учебници“, соопштуваат од СДСМ.
По повод оваа немила појава која се провлекува со години наназад, во секој изборен процес, во ЦИВИЛ – Центар за слобода кратко известуваат констатирале бројни случаи на злоупотреби, меѓу кои се и злоупотребите на децата. Оттаму велат дека будно ги следат (пред)изборните политички кампањи и ги охрабрија родителите да пријават политичка злоупотреба на децата.
Дехран Муратов
