поентира: ЏЕВДЕТ ХАЈРЕДИНИ
НЕМА СОМНЕНИЕ
Нема сомнение дека СДСМ на крајот ќе се определи за изборен модел кој му одговара на ДУИ, односно да остане досегашниот модел.
ЈАЗИК ЗА АМНЕСТИЈА НА ХАШКИТЕ СЛУЧАИ
Доколку искрено беше приоритет на ДУИ употребата на албанскиот јазик, зошто во текот на заедничката власт со ВМРО, кога имаа двотретинско мнозинство во собрание, не го донесоа овој закон, туку доволна им беше само амнестијата на хашките случаи, со што Груевски го оставија намира во текот на целиот мандат, како што вели и тој самиот во една „бомба“: „да бидеме раат цел мандат“.
НА СИТЕ ЛИ ЛЕКНА…
Со изјавата на Б. Османи на АЛСАТ-М, дека земјата ќе ја прифати новата методологија што ќе ја предложи Франција, се отстранува уште една сериозна пречка за почеток на преговорите за зачленување на Македонија во ЕУ.
ЗОШТО СТАВРЕСКИ САКАШЕ ДА МУ ЈА СКРШИ ГЛАВАТА НА ГРУЕВСКИ
Пред да ветува подобра економска политика кога ќе дојде на власт, Мицкоски нека го праша Зоран Ставревски зошто во моменти му идеше да му ја скрши главата на Груевски, зашто го тера, и кога немаме за леб, да купуваме чоколада, или околу една милјарда евра да се фрлат покрај Вардар во строгиот центар на Скопје.
ПОСЛЕДИЦИТЕ ОД ЕКОНОМСКАТА ПОЛИТИКА НА ВМРО-ДПМНЕ И ДУИ
Не се случило тоа многу одамна, за да се заборави каква економска политика ВМРО водела кога со ДУИ беа во заедничка власт. Мицкоски треба од таа политика или да се оградува или да ја подржува, зашто последиците ќе ги чувствуваме уште долго време.
ПРОБЛЕМИТЕ НА МАКРОН
Сега испадна дека ние да не сме ти биле толку голем проблем за Макрон.
РЕФОРМИТЕ ЗА НЕКОИ ЗНАЧАТ ОДЕЊЕ В ЗАТВОР
За жал на тие што денес во Македонија се на власт, на памет не им паѓа, не да го променат постојниот изборен модел, туку нема да направат ниту било која друга реформа, зашто на многумина од нив реформата значи да завршат во затвор.
ТАЛАТ ЏАФЕРИ ГРУБО ЈА ПОПРЕЧУВА ПРАВДАТА
Талат Џафери, по спасувањето на Трајко Велјаноски од притвор, со тоа што на обвинетите пратеници на ВМРО и ДУИ, со сосема неубедливи изговори, им овозможува да не се појават на судско рочиште, продолжува грубо да ја попречува правдата. После, Тимоние ни е виновен.
УСЛОВИТЕ ШТО НЕ БЕА ИСПОЛНЕТИ
Од амбасадорот на Франција во Белград, Луи Фалконе, меѓу другото, дознавме и дека од Македонија било побарано реформа на СЈО, додека од Албанија реформа на правосудството: „Беа поставени одредени услови и тие услови не беа исполнети“.
СКЕПТИЦИ
Од своја страна, најголемиот поддржувач на Македонија и Албанија, Германецот Михаел Рот, сугерира дека „Македонија и Албанија мора ангажирано да продолжат со своите реформски напори. Тоа е најдобриот сигнал до сите скептици“. По сѐ изгледа бројот на скептиците од ден на ден (ќе) расте.
ПАРИТЕ ЗА ПАРТИСКИТЕ ВОЈНИЦИ ШТО НЕ ОДАТ НА РАБОТА
Министерката за финансии ни кажа дека „сега од министерството ќе го забрза растот на нашата земја со примена на дигиталните технологии во сите области во живеењето“. Таа верува дека дигитализацијата е решение за многу проблеми.
Затоа, таа е многу наклонета кон дигиталната технологија, дигитализацијата и користењето на дигиталните технологии во Владата, секаде каде што тие можат да дадат вредност. Додава уште и дека сите ние можеме да се справиме со предизвиците да се решат проблемите користејќи ја технологијата.
Иако не спомна дека со дигитализацијата во иднина сигурно полесно ќе го изврши и трансферот на парите од буџетот до избирачите на партијата на власт кои не доаѓаат на работа.
СПОЈУВАЊЕТО НА ДРЖАВАТА СО ПАРТИЈАТА
На Премиерот му останува уште само да најде кој ќе ја врши должноста министер за финансии додека таа го забрзува “растот на нашата земјата”. Премиерот Заев должен е јавноста да ја информира дали со негово знаење и дозвола функционери на една партија на власт, ги повикуваат државните службеници на состанок во седиштето на партијата за да им дадат упатства за нивната идна работа.
Дали ова значи дека Премиерот и овие функционери ги заборавиле наодите на групата на Прибе со кои, меѓу другите, со скандалот со прислушкувањето, се потврди и спојувањето на државата со партијата.