На вчерашната конференција „Враќање на одземената правда“, беа изнесени и неколку потресни сведоштва на луѓе – жртви на политички прогон, обвинети и членови на нивните семејства.
Сведоштво на обвинет во случајот „Шпион“
„Осуден на три години затвор, потоа преименувана затворска казна во условна казна од 5 години. Јас нема да се произнесувам во врска со случајот, ниту со правните последици од случајот, туку ќе зборувам како сведок, нем сведок, за една личност, која беше осудена во процесот „Шпион“. Се работи за четвртообвинетата личност, која за жал беше припадник на институцијата од прво вработување и кој повеќе не е меѓу нас, замина онаму кадешто еден ден сите ќе заминеме. На таа личност четири месеци пред да му се случи она што ни се случи на сите нас, констатирана му е смртоносна дијагноза. Тој фатален ден, четири месеци подоцна, на 16 септември е лишен од слобода, и покрај тоа што неговите претпоставени знаеле за неговата здравствена состојба. Ден потоа му е одредена мерка притвор од 40 дена по што е пуштен во домашен притвор. Доаѓаше на сите рочишта, со придружба бидејќи не можеше ниту по скали да се качи и за жал не го дочека крајот. Јас овде прашувам пред сите вас, дали постои пишан збор во позитивните законски прописи за заштита на луѓе со таква дијагноза?“
Случајот „Монструм“ е игра со времето!
Бедри Ајдари – претседавач на Координативниот организационен одбор за случајот „Монструм“, сведочи за сите неправилности во судската постапка за случајот „Монструм“.
„Барам од оваа Комисија и од медиумите да побараат одговорност за овој случај. Овој случај се уште нема епилог. Она што ни се случува од 1 мај 2012 година е уништување на животите на цели семејства, уништување бракови, растење на мали деца без родители, починати членови на семејства од стрес и страв за судбината на најблиските, сето тоа направено со цел една политичка гарнитура да остане на власт. Тоа е играње со времето. Потоа имаме прекршување на презумпција и да бидат осудени истиот ден кога се приведени, и тоа од врвот на државата, злоупотреба на службената должност, злоупотреба на заштитен сведок, прикривање на материјални докази, неприфаќање на алиби, промена на истражен судија само за да се постави играч на власта, професорот Алексеј Дума, после пет години се изјасни дека за случајот „Монструм“ и за неколку други случаи треба да се отвори уште една постапка, злоупотреба на ПИМ мерки. Сите овие работи се случуваат под покровителство на Владата. За случајот „Монструм“ се изјаснија највисоките ентитети кои велат дека во затвор се невини луѓе! Дали Македонија како држава има капацитет да го заврши овој случај во законита постапка, со реална опасност, знаејќи дека, има реална опасност овој случај да се искористи за политички цели, па дури и за граѓански немири“, рече Ајдари.
Канцерот е во минатата власт!
Милчо Демерџиев – специјалист невролог, осуден во случајот „Метастаза“.
„Јас работам на медицина базирана на докази, значи јас кривично одговарам ако не спроведам постапки и дејствија коишто би загрозиле здравје на пациент. Тука сум за еден можеби заборавен предмет „Метастаза“, веројатно терминот „канцер“ бившата власт го оставила за нив, бидејќи очигледно е дека канцерот е таму. Тука сум за 80 дена во затворот во Шутка и осум месеци домашен притвор, поради некое злосторнично здружување кое се случило на непознат датум, на непознато место, во тек на цела година, иако злосторничко здружените не се познавале меѓу себе… Ние, меѓу првите, имавме заштитен сведок. Јас лично не го познавам, некои од обвинетите велеа дека го познаваат и дека против него се води друг процес. Осуден сум за издавање на невистинита медицинска документација, утврдено од судијата и од обвинителот, кадешто не е извештачен ниту микрон од медицински документ, кадешто судијата и обвинителот стануваат и кардиолог, и невролог, и психијатар, и психолог. Ја поздравувам оваа иницијатива и сакам да напоменам бидејќи ќе се филтираат предмети, онаму каде што има предзнак заштитничко здружување, каде што има заштитени сведоци, сето тоа одново да биде отворено. И на крајот, она што го бараме сите ние, само фер судење!“, вели Демерџиев.
Наместо Скопје 2014, нам да ни изградат споменици!
Верка Бачварска, мајка на обвинет во случајот „Детонатор“.
„Јас сум граѓанин на оваа држава, член на овој Комитет и исто така се чувствувам како жртва на овој систем од претходниот режим, бидејќи сум и мајка на еден од осудените во политички монтираниот процес „Детонатор“. „Детонатор“ е процес кој грандиозно и бомбастично беше најавен како акција за покер апарати. За на крајот, кај некои од обвинетите после неколку месеци, заврши со обид за убиство со умисла. Член, којшто и ден денес избегнувам да го изговорам, го сонувам и од кој имам кошмари. Акцијата „Детонатор“ се случи благодарејќи на вистинското злосторничко здружување на минатата власт во оваа држава. Можете да замислите каков е нашиот правосуден систем, како работела фамилијата на власт, вистинското злосторничко здружување, за кое немаше да знаеме да не беа т.н. бомби. Немаше да ја слушаме Јанкуловска како вели ‘еднаш да ги ставиме во притвор, после е лесно, се навикнуваат!’ Да! Се навикнаме и ние родителите. За жал, или за среќа некои сме се уште живи. Во процесот „Детонатор“ починаа две мајки и еден татко. Многу пати си мислам, бидејќи шестта година, како се овие луѓе во затвор, се молев син ми од одделение Ц, како што би рекол Кежаровски, одделение каде што сакаат да те скршат да го преместат на друго место. Некои од нас се уште не се скршени! И знам дека кога ќе се дислоцираат спомениците од Скопје 2014 треба нам да ни изградат споменици! Мислам дека со секој шамар, со секој ден на мојот син и на неговите блиски таму во затвор, сум уште посилна!“, вели Бачварска.
Ние не сме луѓе, ние сме духови!
Љубомир Бундалески обвинет во случајот „Змиско око“.
„Јас сум од „Змиско око“ – првенчето. 23 ноември лично, десет години од апсењето, нема да зборувам дали е спектакуларно, знаеме сите како беше, немаме никаква пресуда. Два пати Апелација ја поништува пресудата. Условите во затворот се на сите познати. Јас сакам да зборувам за прекршувањата на правдата што се врши во судот. Обвинителката Вилма Русковска може да покрене обвинение против мечка! Па добро, тие луѓе имаат ли некој, како што јас сум одговорен за мојата работа, има ли некоја санкција, тие да одговараат за нивната работа? На крајот кога не можеа да констатираат економска штета, донесоа вешто лице, кое што се потпишуваше на вештачењата како вешто лице, и го има на записник, адвокатот Вуиќ го прашува дали знае дека прави кривично дело, затоа што се потпишува како вешто лице, а не е лиценциран вештак и судијката даде пауза. Тоа е првиот дел, вториот дел е репресијата. Утрински весник, на 19 ноември 2007 година пишува обвинет, татково име и презиме. Што со тоа? Сите сме бележани црни овци. Веќе не сме луѓе, веќе сме духови!“, вели Бундалески.
Поддршка на конференцијата даде и поранешниот министер за внатрешни работи Љубе Бошковски.
„Јас само да ви кажам дека нема режим, којшто не ме апсел. Почнувајќи од југословенскиот затоа што работев на проектот на растурање на Југославија. Успеавме да ја донесеме самостојна Македонија, верувавме во неа, верувавме дека во нашата држава ќе владее правото, но, за жал, видовме дека не поминав неказнет и во оној и во претходниот режим, за на крајот на мене да биде применето англо-саксонското право и заминав во Хаг. Но ова што го доживеав во пост-хашкиот преиод е најстрашното. Затворите ми го делат времето и животот. Поминав скоро десет години робувајќи за оваа земја. Верувам во овие луѓе кои земаа сериозна обврска да го одбранат правото, да ја вратат правната држава. Сакам да апелирам, бидејќи повеќе од сигурно е дека ќе се донесе Законот за амнестија, да се примени едно старо начело, кое е повеќе реторичко, а тоа е: подобро илјада виновни на слобода, отколку еден невин во затвор. Во овие пет години самувајќи во Идризово, без никакви права, како викенд и слично, како што имаат другите, во тој македонски Сибир, лежат над 50% луѓе кои се невини!“, истакна Бошковски.
Маја Ивановска
Камера: Дехран Муратов