Заев: Русија не стои зад руските пранкери
Премиерот Зоран Заев денеска, рече дека телефонскиот разговор со руските комичари е приватна работа со која не би требало да се поврзува Руската федерација.
„Сметам дека овие пранкови или фејк перформанси претставуваат приватни работи, не се акт од Руската Федерација и не смеат ваквите работи да се испречат пред нашите пријателски односи. Соработката со Руската Федерација е една од нашите цели, зајакнување на таа соработка на економски и на секаков план“, истакна Заев.
Спасовски: Безбедносната состојба е стабилна, мирна и без индиции за нарушување
Безбедносната состојба е стабилна, мирна и нема никакви индиции за нарушување на целата територија на државата, изјави министерот за внатрешни работи Оливер Спасовски одговарајќи на новинарско прашање какви се безбедносните проценки по најавите од Ел Чека „дека е можно да се случи ново Куманово на сред Скопје“.
-МВР и сите други органи кои се надлежни за спроведување на законот си ги преземаат сите свои активности во однос на безбедносната состојба, истакна Спасовски кој утрово проследи дел од селекцијата на кандидадтите за нови полициски службеници во Центарот за обука на МВР во Идризово.
Уапсен уште еден учесник на насилството на 27 април во Собранието
Синоќа околу 21:30 часот полицијата го уапси Светозар Петровиќ, осуден на 18 месеци затвор за “лажно идентификување“, инаку познат на МВР по тоа што беше еден од членовите на протестите „За заедничка Македонија“ и упадна во Собранието на 27 април.
Познат како “Лаки Арамбаша” долго време беше во бегство. Тој беше еден од организаторите на протестите “За заедничка Македонија”, а обвинителството за организиран криминал и корупција поднесе обвинение за организирање на насилството во Собранието.
Платформа против корупција: Да не дозволиме една заробена држава да се замени со друга
Платформата на граѓанските организации за борба против корупцијата излезе со реакција предупредувајќи дека премиерот Зоран Заев и како в.д. министер за финансии го прекршува законот за спречување на корупција и судир на интереси.
Со мотото „Да не дозволиме една заробена држава да се замени со друга“ Платформата на граѓанските организации за борба против корупцијата упати укажување со кое ги поткрепува посочувањата на јавноста и Државната комисија за спречување на корупција.
Марш за одбележување на 24 години од геноцидот во Сребреница
По повод 24 годишнината од геноцидот во Сребренца денеска ќе се одржи Марш на слободата со почеток во 18 часот, а ќе започне во паркот во Чаир. Маршот ќе заврши на плоштад Макеоднија каде во 19 часот се очекува прикладна програма во сеќавање на жртвите. На денешното одбележување во Сребреница ќе присуствува и македонска делегација предводена од претседателот на Собранието, Талат Џафери заедно со пратениците Ферид Мухиќ и Зеќир Рамчиловиќ. На одбележувањето претседателот Џафери ќе има и пригодно обраќање.
Амнести Интернешнл со петиција за ослободување на кинематографот Мин Хтин Ко Ко Ги
Амнести Интернешнл започна петиција за ослободување на кинематографот Мин Хтин Ко Ко Ги, уапсен во Мјанмар по критикувањето на социјални мрежи на воениот нацрт Устав на земјата и улогата на војската во политиката.
Дехран Муратов
