ВЕСТ НА ДЕНОТ: Пендаровски: Разочаран сум од луѓето од кои очекувавме правна држава
Претседателот на Република Северна Македонија Стево Пендаровски, по повод последните случувања поврзани со случајот „Рекет“, на денешната прес конференција, изјави дека уште на самите почетоци на аферата „Рекет” бил разочаран од тоа што го слушнал и повика на брза и темелна истрага.
„Наместо тоа, надлежните отидоа на годишен одмор како да се работи за редовна состојба и за рутински предмет, а, не е така. Аудио и видео снимките кои се споделуваат на медиумите изминативе денови предизвикуваат длабоко разочарување кај сите граѓани, а особено кај оние кои со години и по цена на постојани притисоци и закани од поранешната власт протестираа секојдневно барајќи правда. Револтот кај граѓаните е огромен и сосема оправдан. И јас, како граѓанин, како човек, не само како претседател, сум разочаран затоа што се изневерени и моите очекувања и тоа најмногу од луѓето од кои очекуваме да се борат за правна држава“, изјави Пендаровски.
На новинарско прашање, каков е неговиот став за Катица Јанева сега, со оглед дека ја поддржуваше, подеднакво како и Специјалното јавно обвинителство, Пендаровски одговори дека уште верува во СЈО, но како човек е разочаран од Катица Јанева.
Катица Јанева се врати на работа, а обвинителката Вилма Рускоска во средa се враќа од одмор, прва на распит токму Јанева
Специјалната јавна обвинителка Катица Јанева по еднонеделниот одмор се врати на работното место, потврдуваат од СЈО за медиумите. 
Шефицата на Јавното обвинителство за гонење организиран криминал и корупција, Вилма Русковска, вo среда се враќа од одмор на работа. Од обвинителството велат дека сите инволвирани во случајот „Рекет“ ќе бидат повикани на распит, вклучувајќи ја и специјалната јавна обвинителка Катица Јанева, но не откриваат кога тоа точно ќе се случи.
ДКСК покренува постапка за раскинувањето на договорот меѓу ФЗО и болницата „Жан Митрев“
Државната комисија за корупција отвори предмет по сопствена иницијатива откако Владимир Чадиковски, единствениот лиценциран детски кардиохирург, даде отказ од болницата „Жан Митрев“. ДКСК ќе испитува кои биле причините за раскинување на договорот меѓу Фондот за здравство и болницата „Жан Митрев“. Една од причините за разгледување на договорот се информациите што излегоа во медиумите дека докторот Жан Митрев немал лиценца за детска кардиохирургија.
Флеш вести:
Народниот правобранител апелира до Владата да го реши прашањето со депониите, особено до Министерството за животна средина и просторно планирање како реакција на полседните случувања со опожарувањето на сметот во регионалната депонија Русино крај Гостивар, како и во депонијата Буково крај Охрид.
„Еко системот во никој случај на смее да се гледа како изолиран, туку напротив тој е интегриран, па оттука загадувањето ќе влијае врз сите,“ се вели во соопштението на омбудсманот Иџет Мемети.
Околу 621 илјада парчиња оружје поседуваат граѓаните на Република Северна Македонија, односно 29.79 парчиња по глава од жител. Од нив, само 169.687 се регистрирани, а 451.313 нерегистрирани, покажуваат податоците од истражувањето на организацијата „Small Arms Survey“ (SAS).
Со овие бројки нашата држава се наоѓа на осмото место во Европа, а е 13-та во светот по поседување огнено оружје по глава на жител. На прво и второ место во Европа се две земји од нашиот регион Црна Гора и Србија.
Денеска е Меѓународниот ден на младите, 12 август, кој со резолуцијата 54/120 на Обединетите нации во 2000 година е усвоен со цел постојано да се унапредува положбата на младите во општеството.
Целта е вклучување на младите во општеството како клучен фактор за градење и одржување на мирот и безбедноста, но и нивно активно учество во политичките, економските и социјалните процеси.
ЦИВИЛни активности
Агендата на Семинарот за стратешко планирање, едукација и градење партнерства: „Транспарентност и одговорност во политичките процеси“ на ЦИВИЛ веќе предизвикува големо внимание. Семинарот ќе се одржи на 14 и 15 август, во хотел „Романтик“, на брегот на Велешко Езеро. Бројот на учесници за отворените сесии е ограничен, па затоа, потребно е да се пополни онлајн пријава за учество.
Специјални гости на семинарот се првата антикорупционерка, Билјана Ивановска, експертот за финансии, до скоро советник на екс-министерот Драган Тевдовски, активистот за човекови права, Бранимир Јовановиќ, како и градоначалникот на Велес, Аце Коцевски. Тие ќе говорат во сесии што се отворени за јавноста.
Б. Јордановска
