пишува: ЏАБИР ДЕРАЛА
Без стил, без манири, простачки вулгарно и насилнички, а најчесто кукавички скриени во длабоката сенка на анонимноста, неуморните партиски тролови продолжуваат со својот валкан бизнис. Тие се најнискиот ешалон на една мрачна, добро организирана и богата мрежа од луѓе на високи позиции во општеството и во институциите, со длабоки корени во политиката, бизнисот, академијата и медиумите. Човек не мора да биде Магелан да го открие тоа.
Може да се сретнат, во не мали бројки, во секоја категорија: новинари и уредници, универзитетски професори, „невладини“ експерти, уметници и естрадни ликови, „инфлуенсери“, генерали, директори на државни агенции, полицајци, пратеници, генерали, советници, лекари, членови на бордови, наставници, бизнисмени што никогаш сами не заработиле ништо, апаши и тепачи…
Слабостите на институциите, пропустите на властите, корупцијата и организираниот криминал се нивните сојузници. Демократијата и слободата на изразувањето се дел од нивниот арсенал. „Како тоа?“ – ќе прашаат помалку упатените, а такви изгледа се во мнозинство. Одговорот е едноставен: Тие ја користат демократијата и слободата на изразувањето за да дејствуваат непречено, со нивна директна и груба злоупотреба. Така е овде, така е и во многу други земји низ светот.
Нивните удари се насочени против правдата и владеењето на правото, демократијата и човековите права и слободи. Имаат јасна цел: Да ги разнишаат институциите, да внесат тензии и несигурност кај луѓето, да воспостават насилнички и криминален режим – сојузник со меѓународните радикални и криминални банди.
Служејќи се со корупцијата за која имаат погодно тло што самите го создавале низ генерациите политичари и моќници, тие немаат никаков проблем да продрат во јавната сфера и да го сеат својот отров секојдневно. Можеби е лесно да се препознаат лажните вести и говорот на омразата, но тешко е да се искоренат. Како вошки. Нивната најголема лага е дека се патриоти, а потоа следат сите останати лаги, спакувани во кампањи со украдени идеи, платени со украдени пари.
Тие се непријатели на фактите. Оние во најдолните ешалони се само најпримитивните и највалканите пешадинци во нивната формација која со години спроведува погром врз демократијата. Мали, валкани и здодевни како муви, тие служат како алатки за одвлекување на вниманието, за внесување шум во јавната комуникација, да влеат страв, несигурност или паника. Се нафрлаат во роеви и контаминираат секаде каде што ќе се стапнат со своите тенки, криви и влакнести ноџиња.
Зад нив стојат многу поголеми предатори, широко распространети и организирани, гигантски и дебели инсекти, интелигентни социопати и криминалци, со голема моќ за ширење на вирусот за деградација на општеството.
Креирањето на општа несигурност и недоверба во институциите, смислувањето суптилни и повеќеслојни теории на заговорот, пораките што предизвикуваат потценување на европските вредности и на човековите права, дефетизмот и сегрегацијата, омразата кон поинаквите и послабите… Сето тоа бара ресурси, човечки и финансиски. А се има и се може. Црни пари има во изобилство. Се крадело со години, а финансиери имало и ќе има, како дома, така и во странство.
Пандемијата, како и секоја друга несреќа и криза, за нив се одлична можност за полнење на акумулаторите на нивната злокобна машинерија. Лесно е да се излаже, а потоа лагата и семето на омразата се расеат насекаде, тешко е да се санираат последиците од подземната зараза. Особено кога „дистрибутери“ се и ликови што без мака го преживеале падот на криминалниот режим и останаа на одговорни функции во системот, да го контаминираат и разградуваат од внатре.
Но, болеста не е неизлечива.
Лекот е откриен, терапијата е позната. Само треба да се примени. Доволно е домашно лекување. Тоа се состои од неколку правилни, добро одмерени удари: Солидарност, почитување на човековите права и слободи, будност и преиспитување на фактите. Постојано преиспитување на фактите. И никако не смее да се заборави историјата на болеста: злоделата и теророт што ги сториле, а спремни се да ги повторат во секое време и на секое место.
Сите права се задржани. Услови за користење, авторски права и заштита на приватноста.
