Насилството врз жените, според Конвенцијата на Советот на Европа за спречување и борба против насилство врз жените и домашното насилство, подразбира кршење на човековите права и форма на дискриминација врз жените и ги означува сите акти на родово засновано насилство, коишто веројатно ќе доведат до физичка, сексуална, психичка или економска повреда или страдање на жените. Насилството насекаде претставува огромен проблем, и решението за истото, иако треба да биде доста едноставно, сепак сведоци сме дека не е така. За жал, голем дел од жените и девојчињата, ширум светот, се жртви на насилство и многу често, тие како жртви го прекинуваат тој круг на насилство многу доцна или воопшто не го прекинуваат од причина на срам или поголем страв. На годишно ниво се организираат различни активности и настани кои би овозможиле поголемо будење на свеста кај луѓето, иако тоа би требало да го знае секој од самиот момент од кога станува свесен за себеси.
За таа цел, овогодинешната Кампањата „Шестнаесет дена активизам против родово насилство“, во организација на Обединетите нации, и во соработка со институциите во Македонија, која се оддржува низ различни градови во Република Македонија, има за цел да ја подигне свеста на меѓународно ниво, и да се раздвижат активностите за да се стави крај на насилството врз жените и девојчињата во светот. Почетокот на оваа кампања беше одбележан на 24 ноември во Собранието на Република Македонија, каде обраќање имаа Претседателот на Собранието Талат Џафери, Претседателот на Владата Зоран Заев, Министерката за труд и социјална политика Мила Царовска, и постојаната координаторка на Обединетите нации во земјата Луиза Винтон. На почетниот настан во Собранието, Мила Царовска, министерката за труд и социјална политика, изјави дека борбата против родовото базирано насилство е задача на институциите, но не и само нивна, туку дека е борба на заедницата во целина, бидејќи последиците од поеднинечните акти на насилство се рефлектираат врз целото општество.
Кампањата овозможува да се реализираат работолници во различни училишта низ Македонија, и последната, која се оддржа вчера во Кичево, беше на тема „Препознавање и заштита од родово базирано насилство“. Работолниците се организираат од женската иницијатива „Антико“, и граѓанската активистка Валдете Адили изјави дека насилството е еден од главните механизми кој влијае на одржувањето на нерамноправната положба меѓу половите и ги држи жените под контрола.
„Сепак, насилсвото е истовремено и машко односно општествено прашање во кое треба да имаат водечка улога и мажите со цел да се носат вистински одлуки за промени и вредности на универзалноста на човековите права“, рече Адили.
Претходно вакви работилници се одржаа и во училишта и во Тетово, Гостивар, Јегуновце, Делчево и Пробиштип.
Со оваа кампања, „Антико“ дава поголем и поактивен придонес за еден побезбеден свет и достоинствен живот без насилство и почитување на правата на секоја индивидуа, и истата ќе трае до 11 декември.
Ангела Петровска
