Мерката „Мој ДДВ“ ги дава резултатите за целите за кои е воведена – влијае на намалување на сивата економија и враќа пари на граѓаните, цени директорката на Управата за јавни приходи, Сања Лукаревска. На денешната прес-конференција Лукаревска извести дека заклучно со 19 септември скенирани се 19,905,878 фискални сметки, остварен е промет од 10,073,372,640 денари, вкупниот ДДВ изнесува 1,093,180,972 денари, додека повратот на 15 проценти од платениот ДДВ изнесува 163,977,146 денари или 2.666.000 евра.
Дека оваа мерка дава резултати во целокупната економија докажува и податокот дека само во првите месеци од воведувањето на МојДДВ, јули и август, наплатата на ДДВ е зголемена за 10 проценти во однос на минатата година. „Наплатата на вкупниот даночен приход во 2019 година заклучно со август изнесува 53,4 милијарди денари што е за 9,2 милијарди денари повеќе , односно за 20.08 отсто повисока во однос на истиот период во 2015 -та година“, изјави Лукаревска.
Директорката истакна дека голем напредок има и во повратот на ДДВ кон фирмите, кое се врши редовно и неселективно кон секој даночен обврзник. Во 2019 заклучно со август извршен е поврат за 49.7 отсто повисок во однос на 2016 година.
„Годинава во стопанството се инјектирани 17 милијарди, 43 милиони денари (17,042,453,348), додека во 2016 година во истиот период, повратот изнесувал 11 милијарди 906 милиони денари (11,905,621,064). Во изминатиот период УЈП разви и Модул за автоматски поврат на ДДВ кон фирмите и пребивање на претплата на даноци кон сите даночни обврзници преку којшто целосно се намалува можноста од субјективност во постапката“, рече директорката на УЈП, Сања Лукаревска.
А. Зеќири