Јанева не чувствува вина и се надева дека со нејзините аргументи ќе се забрза истрагата за „Рекет“
Специјалната јавна обвинителка, Катица Јанева, изутринава пристигна во Обвинителството за организиран криминал каде што дава исказ за случајот „Рекет“ во кој осомничени се Бојан Јовановски и Зоран Милески за рекетирање на бизнисмени. Јанева на доаѓање во Обвинителство изјави дека се надева оти со нејзиниот денешен исказ ќе помогне да се забрза истрагата за „Рекет“.
По четири часа заврши распитот во ОЈО на специјалната обвинителка Катица Јанева, која на излегување пред новинарите изјави дека е повикана како сведок во случајот „Рекет“ и дека не се чувствува виновна. На прашањето дали знае кај завршиле парите, Јанева одговори дека ова е истрага и во истрага не се споделуваат информации.
Катица Јанева влезе во ОЈО во придружба на адвокатот Стеван Павлевски, кој е адвокат на Цветан Панделески кој е еден од осомничените во случајот „Империја“.
Судењето за „ТНТ“ продолжува на 30 август
Во Основниот кривичен суд во Скопје, денешното рочиште за случајот „ТНТ“ на Специјалното јавно обвинителство се одложи за 30 август, заради отсуство на судијата Огнен Ставрев, кој го води предметот, а во моментов е на боледување.
Случајот „ТНТ“, се однесува на уривањето на станбено-деловниот комплекс „Космос“ на бизнисменот Фијат Цаноски, кој се наоѓа во доказна постапка, а на последното рочиште беа сослушани сведоци предложени од одбраната.
Македонија и Бугарија ќе ја зајакнуваат регионалната соработка
Премиерот Зоран Заев, заедно со министерот за локална самоуправа Горан Милевски и владина делегација, денеска, беа домаќини на делегација на Република Бугарија предводена од министерката за регионален развој и урбанизам Петја Аврамова.
На средбата, што се одржа во Владата, премиерот Заев истакна дека две години по потпишувањето на Договорот за пријателство, добрососедство и соработка меѓу Северна Македонија и Бугарија е постигнат значаен напредок во соработката меѓу двете земји во повеќе сектори и е зајакнат политичкиот дијалог.
ФЛЕШ ВЕСТИ
Јавното обвинителство отфрли иницијатива на ДКСК поради застареност.
Битола со 5 милиони денари од Владата ќе се справува со аерозагадувањето.
Просечната исплатена нето-плата по вработен, во јуни 2019, изнесувала 25. 205 денари и е за 4,1 отсо поголема од јуни минатата година.
Се интензивираат активностите со Иницијативата на ЦИВИЛ „Крај за расипништвото“ за укинување на привилегиите на функционерите. Иницијативата #КрајЗаРасипништвото во нејзината онлајн верзија до сега ја потпишале над 2.500 луѓе. Ќе биде достапна за потпишување до почетокот на септември…
ЦИВИЛ ги охрабрува и ги повикува граѓанките и граѓаните да се приклучат во борбата за спречување на корупцијата.
Дехран Муратов
