Владината реконструкција наредната недела во Собранието
Владиниот портпарол Муамет Хоџа денеска изјави дека се очекува во почетокот на наредната недела Собранието да го усвои предлогот за најавената реконструкција.
Според него, предлогот за промените во владиниот кабинет премиерот Зоран Заев треба да ги достави до крајот на оваа недела. Во меѓувреме, како што наведе Хоџа, Заев ги продолжува консултациите со партиите од коалицијата.
Канада го ратификуваше протоколот за членство на Македонија во НАТО
„Канада со задоволство го ратификуваше пристапувањето на Северна Македонија во НАТО. Додека славиме 70 години НАТО, со нетрпение очекуваме да ве поздравиме како 30-та членка на Алијансата во блиска иднина“, објави канадското МНР.
Во меѓувреме, во тек е постапката за ратификација и во Сенатот на САД. Се очекува ратификацијата на Протколот во Вашинготн да се случи до крајот на летово.
Пред десеттина дена Протоколот за НАТО го ратификуваа Германија и Естонија.
Со ратификацијата на Протоколот од 29-те земји сојузници во Алијансата, Македонија се очекува и официјално на Самитот во Лондон кога ќе се одбележи 70 годишнината, да стане 30-та членка на НАТО.
Бугарија и Македонија можеби заедно ќе претседаваат со Берлинскиот процес
Бугарија и Северна Македонија најверојатно ќе имаат заедничко претседателство со Берлинскиот процес идната година, најави министерот за надворешни работи на Полска Јацек Чапутович, пренесува Бугарското национално радио.
Актуелен претседавач со Берлинскиот процес е Полска, а следниот треба да биде определен на Самитот во Познан на почетокот на јули годинава.
Случај „Тортура“: Камчев не се појави да сведочи, обвинителот бара да биде спроведен
Обвинителот Љубомир Лапе на денешното рочиште за предметот „Тортура“ побара на наредното рочиште сведокот Орце Камчев присилно да биде донесен во судот, односно со полиција.
Денешното рочиште беше одложено, бидејќи во судница не се појави обвинетиот Метуш Шабани поради здравствени проблеми.
Во случајот „Тортура“ обвинети се поранешниот директор на УБК Сашо Мијалков и уште шестмина припадници на алфите.
Граѓаните за државата или државата за граѓаните!?
На 25 јуни ЦИВИЛ – Центар за слобода организира панел дискусија посветена на човековите права и слободи, транспарентни и одговорни политички процеси и владеење на правото. На панелот ќе говорат професорките Јасна Бачовска и Мирјана Најчевска, како и активистката Мерита Максути.
Настанот е дел од проектот „Граѓански објектив“ кој ЦИВИЛ веќе четврта година успешно го спроведува во соработка со National Endowment for Democracy.
М. И.
