ВЕСТ НА ДЕНОТ: Ослободителни пресуди за петмина обвинети во случајот „Шпион“
Кривичниот суд во Скопје денеска им изрече ослободителна пресуда на петмина обвинети во повторената постапка за случајот „Шпион“. Судот ги ослободи од обвинение Миќо Насковски за делата „измама“ и „уцена“, Марјан Маџовски за „уцена“, Горан Стојков и Цветан Дамјановски „за недозволено чување и поседување оружје“ и Ѓорги Хаџимицев за делото „послужување во службата“.
ТЕМА НА ДЕНОТ: Преспанскиот договор и лажните вести – носители на кампањата на ВМРО-ДПМНЕ
ВМРО-ДПМНЕ во денешното соопштение ја информира јавноста дека „доколку освои двотретинско мнозинство ќе стори се што е можно за да ги коригира штетите кои Зоран Заев и ги направи на Република Македонија“. По сѐ изгледа, токму Преспанскиот договор ќе биде темата на предвремените парламентарни избори како носечки елемент на кампањата на ВМРО-ДПМНЕ, исто како што беше и за време на кампањата на претседателските избори.
За оваа најава на ВМРО-ДПМНЕ зборувавме и со Зоран Иванов.
Покрај Преспанскиот договор деновиве партијата преку медиумите блиски до неа повторно шири невистинити информации кои имаат за цел да создадат хистерија во јавноста. Овој пат на удар се активистите Јасмин Реџепи и Мерсиха Смаиловиќ кои според овие медиуми се терористи и антисемитисти. Токму поради ова Реџепи во изјава за ЦИВИЛ Медиа најави и тужба до новинарот Љупчо Златев.
БЛИЦ: Хистеријата се шири уште пред официјалниот почеток на кампањата
Маја Ивановска: Во моментов, Мицкоски и неговите медиумски писарчиња се во лов на терористички вештерки во редовите на СДСМ. Нема врска што луѓето не се ни од СДСМ, а уште помалку терористи.
(целиот коментар: ТУКА)
ИЗЈАВА НА ДЕНОТ
ПОЛИТИЧКИ ОКЕЈ КОРАЛ
И денешниот ден помина во знакот на желба има ама никако да се договориме. Ако помисливте дека постои настан или тема за која власта и опозицијата не се „фатија за гуша“ ептен сте ја згрешиле.
Најпрво е Преспанскиот договор, кој очигледно ќе биде најжешката тема околу која ќе се кршат копјата во ова предизборие. Додека ВМРО-ДПМНЕ најавува поништување на Договорот, СДСМ постојано укажува на штетите кои може да ги нанесе ваквата постапка.
И денеска власта и опозицијата не успеаја да ги приближат своите ставови околу Законот за Јавно обвинителство. Сите се за, ама договор нема. Закон уште помалку…
Се скараа дури и за Законот за легализација на дивоградбите. Додека министерот Сугарески ја обвини опозицијата дека го кочи изгласувањето на предложеното законско решение, а ВМРО-ДПМНЕ пак со став дека Законот е продолжение на криминалното работење на СДСМ. Договор повторно нема.
Но, тоа не е се. Власта и опозицијата успеаја да се скараат и за работата на Постојаната анкетна комисија за заштитата на слободните и правата на граѓанинот на која треба да биде разгледат заклучокот за Охрид како заштитено подрачје под УНЕСКО. Па така, пратеникот Трајчо Димков од ВМРО-ДПМНЕ обвини дека СДСМ со денови ја опструира работата на Комисијата. Независната пратеничка Никица Корубин, пак, го претстави ставот на СДСМ дека точката на дневен ред воопшто не треба да биде поставена затоа што се работи за претставка од невладина организација за слободен пристап до информации од јавен карактер. Заклучок нема.
НЕ ПОМАЛКУ ВАЖНО
Крајно време е за чекор напред, порача Димитров од панел за Западен Балкан во Давос
Врховниот суд ќе расправа за првите пресуди на СЈО
Деркоски: Граѓаните и сега можат да проверат дали се во Избирачкиот список
ЦИВИЛНИ АКТИВНОСТИ
ЦИВИЛ организира семинар за транспарентни и одговорни политички процеси кој ќе се одржи на 25 јануари во Гостивар, а е наменет за граѓанките и граѓаните од Полошкиот регион. Аплицирањето за учество на семинарот е во тек, а учеството е еден од предусловите за мониторирање на претстојните предвремени парламентарни избори.
СЛОБОДНА ЗОНА
Приказната за балканската преработка на отпадот што стигнува од Италија на Балканот е тема на денешната колумна на Сашо Орданоски со наслов „Ѓубрето е чисто, а и одамна фино мириса!“ во која тој ни сугерира дека „доколу се расчепкаат „бугарските врски“ на високиот ешалон на еднодецениската власт на Груевски, од таму би излегло толку разновидно „ѓубре“, тешко повеќе стотици милиони евра, што ни „Дрисла“ не би можела да го „обработи“ – под услов да добие дозвола да го увезе“.
Зоран Иванов, од корнер, пишува за претстојните парламентарни избори и општата недоверба на електоратот во колумната „Време за сите одговори е дванаесетти април“.
М. Ивановска
во соработка со: Дехран Муратов, Ангела Петровска, Сашо Орданоски и Зоран Иванов