Лидерите на двете најголеми политички партии СДСМ и ВМРО-ДПМНЕ, Зоран Заев и Христијан Мицкоски се негативни на коронавирус, тие остануваат во домашна изолација. Во однос на двајцата лидери на партиите – сите оние кои што досега имале контакт со нив со оглед на тоа што двата резултати се нагативни, не се во никаков ризик – не треба да се тестираат, ниту треба да се самоизолираат, рече министерот за здравство, Венко Филипче на денешната прес-конференција.
*
Лидерот на СДСМ, Зоран Заев по добиениот тест дека е негативен на Ковид-19, на Фејсбук објави дека ќе остане во самоизолација онолку колку што е потребно.
„На уредникот на Канал 5 Гоце Михајлоски му посакувам брзо закрепнување, нему и на неговото семејство.
Воедно упатувам силна поддршка до новинарите и медиумските работници кои во овој период се изложени на ризик вршејќи ја својата работа за навремено и точно информирање на јавноста што е од огромно значење.
Граѓаните, сите ние мора да ги почитуваме мерките и задолженијата. Да седиме дома, да ја зголемиме личната хигиена и да ги намалиме физичките контакти. Само така оваа закана ќе ја пребродиме и полесно и побрзо. Зависи од сите нас“, објави Заев.
*
„Денеска сме особено благодарни на уште една ЕУ и НАТО земја членка, нашиот пријател и сојузник – Чешката Република, за несебично споделената опрема од еден милион медицински заштитни маски. Во мака се познаваат пријателите“, објави министерот за надворешни работи, Никола Димитров.
*
„Живееме во време (невреме) на светска пандемија или ако повеќе сакате, и локална епидемија на вирусот Ковид 19. Значи, не е грев, уште помалку срамота, човек да биде позитивен на коронавирусот. Напротив. Нормално е“, пишува првиот човек на Град Скопје, Петре Шилегов на Фејсбук.
„Овој вирус не бира националност, вера, политичка припадност, функција, работно место…
Ковид 19 позитивен, може да е било кој. На тие луѓе им треба поддршка, не жигосување. Со поддршка, секој од нас, на некој начин придонесува оваа инфекција помалку да се шири. Затоа, почитувани, Ве молам, без осуда (судење) јавно или суптилно“, објави Шилегов.
*
Коалицијата „Сите за правично судење” ги повика надлежните служби, вклучувајќи ги судовите, Судскиот совет, Министерството за правда, Управата за извршување на санкции, како и казнено поправните и воспитно поправните домови и установи, да ги преземат сите расположливи мерки кои се во нивна надлежност, а со кои би се придонело кон превенирање на потенцијална и сериозна инфекција со КОВИД-19 во установите каде се наоѓаат лица лишени од слобода.
(ГАЛЕРИЈА/ВИДЕО) Куманово втор викенд со целосна забрана за движење
Птици, кучиња, по некој полицаец, неколку службени возила што се движат по празните улици…. Куманово, втор викенд со целосна забрана за движење, која од денеска 10 април се воведе во целата држава. Забраната важи од петок во 16 часот до понеделник во 05 часот. Во работни денови полицискиот час започнува во 16 часот и завршува во 5 часот наутро.
Дехран Муратов
Во соработка со Дијана Тахири и Биљана Јордановска
