ПОЕНТИ Условот на ДУИ за одржување на изборите е на нив да присуствуваат набљудувачи на ОБСЕ. Тоа значи дека постои можност во Македонија никогаш да не се одржат избори и тие да останат на власт. Паметен предлог, нема што. – поентира Џевдет Хајредини
БАРАЊА Кумановскиот кризен штаб бара од Владата, во најитна постапка да донесе мерки, протоколи и препораки за брзо заживување на стопанските субјекти, а на градоначалникот му препорачува да ги врати во функција сите служби во рамки на Општина Куманово, како и во јавните претпријатија за да се запази функционалноста на општината и потребите на граѓаните.
ИСТРАГА Заменик министерката за внатрешни работи Славјанка Петровска потврдила дека неколкумина стружани кои учествуваа во минатонеделниот верски обред во центарот на градот се повикани на разговор во полицијата.
РЕВИЗИЈА Државните ревизори бараат да се изедначат правилата при уплатата на членарината кај политичките партии бидејќи начинот на уплата сега е регулиран со интерни акти кои се разликуваат кај одделните партии, препорака во извештаите објавени по контролата на сметките за редовно работење на ВМРО-ДПМНЕ, СДСМ, ДУИ и БЕСА.
МЕРКИ Сите мерки што се применуваат во моментов остануваат во сила и тие треба да се почитуваат. Комисијата за заразни болести и експертите не донесоа заклучок дека треба да се почне со укинување на полицискиот час и олабавување на другите рестриктивните мерки, вели заменикот министер за здравство Арменд Аслани.
ИЗБОРИ Дамјан Манчевски, потпредседател на СДСМ, смета дека се можни избори во јуни, но во врска со датумот нема ништо да направат спротивно на лекарските препораки, предлогот е 14 јуни, но ако има причина дека тогаш не е можно да се организираат избори, ќе се одлучи за друг датум.
„Реално, како партија на власт, ни одговараат избори што порано, но не прејудицираме кога да се одржат. Треба да се имаат сите аспекти предвид и евентуалниот втор пик во септември, па да се донесе вистинска одлука за терминот на одржувањето на изборите иако некои сакаат тоа да се случи во прозорецот меѓу двата пика“, изјавува вицепремиерот за европски прашања Бујар Османи, зборувајќи и од позиција на претставник на ДУИ.
Во однос на можноста за одржување избори, пак, заменик министерот за здравсто, Арбенд Аслани рече дека за оваа тема ќе има простор да се разговара кога 14 дена бројот на заболени би бил под пет проценти од бројот на тестирани.
Градоначалникот на Гостивар, Арбен Таравари, пак, рече дека Алијанса за Албанците на лидерска средба ќе оди со ставот, за доброто на граѓаните, изборите да се одржат на крајот на јули или на почетокот на август.
