ВЕСТ НА ДЕНОТ
ССМ бара дополнително зголемување на минималната плата за 6.000 денари
Дополнително зголемување на минималната плата за 6.000 денари, бара Сојузот на синдикатите на Македонија (ССМ). Ваквиот предлог денеска ќе биде доставен до Владата, Организацијата на работодавачите и пратениците, а ќе значи, како што беше речено на прес-конференција, дополнително зголемување на сите останати плати на работниците во земјава.
ССМ бара и за дополнителното зголемување на нето платата од 6 000 денари работодавачите од приватниот сектор една година да бидат ослободени од социјалните придонеси, односно придонесите да ги субвенционира државата, како и дополнителното зголемување на нето платата од 6 000 денари да биде задолжително и за работодавачите од приватниот сектор кои исплаќаат плата и над износот на минималецот.
ИЗЈАВА НА ДЕНОТ
Зеленски: Нема шанси Украина да се откаже од своите територии
Претседателот на Украина, Володимир Зеленски за време на разговорот со новинарите на аеродромот Стенстед при завршувањето на неговата посета на Велика Британија, изјави дека нема шанси за територијални отстапки од украинската страна, нагласувајќи дека Украинците никогаш нема да ги признаат привремено окупираните територии како руски.
Тој нагласи дека Украина никогаш нема да ги признае окупираните територии како руски: „За нас ова ќе биде привремена окупација“.
РЕГИОН
Уапсена вработена во ОБСЕ -Косово за шпионажа, судот и одреди притвор од еден месец
Главните безбедносни и правосудни институции на Косово уапсија жена осомничена за шпионажа на граничниот пункт Јариње со Србија.
Според Специјалното обвинителство, косовската полиција и Косовската разузнавачка агенција (КИА), апсењето е извршено по неколкумесечни истраги. Осомничената Јелена Ѓукановиќ и припаѓа на српската заедница и е вработена во мисијата на Организацијата за безбедност и соработка во Европа (ОБСЕ) во Косово
СВЕТ
Анкета на Си-Ен-Ен: Повеќето Американци сметаат дека политиката на Трамп ја носи земјата во погрешна насока
Според новата анкета на Си-Ен-Ен спроведена од SSRS, ставот на американската јавност за претседателствувањето на Доналд Трамп и правецот по кој ја води земјата е повеќе негативен отколку позитивен, непосредно пред неговото прво формално обраќање во Конгресот по враќањето на функцијата.
Севкупно, 52% не го одобруваат настапот на Трамп на функцијата, а 48% го одобруваат, приближно исто како и во анкетата на CNN во средината на февруари. Анкетата беше завршена пред гневната размена во петокот во Овалната соба меѓу Трамп и украинскиот претседател Володимир Зеленски и не го одразува јавното мислење за тој настан
ПРАШАЊЕ НА ДЕНОТ: На што се должи молкот на македонските политичари за ситуацијата меѓу САД-Украина-ЕУ-Русија?
АЛ-ПРЕС
Редакциски избор од албански медиуми: Проектот на Кушнер на албанската ривиера е „закана“ за италијанската Пулија; Бериша се појави во СПАК; Изброени и поштенските гласови во Косово; 750 косовски Срби ќе бидат употребени за дестабилизација на протестите во Србија
ЦИВИЛНИ АКТИВНОСТИ
Меѓународна онлајн конференција за војната, мирот, авторитаризмот и хибридните закани: „Украина и светот: Отпор против агресијата, победа над авторитаризмот“
ЦИВИЛ ќе биде домаќин на меѓународната онлајн конференција „Украина и светот: Отпор против агресијата, победа над авторитаризмот“, што ќе се одржи утре, 4 март.
Конференцијата е во организација на ЦИВИЛ – Центар за слобода (Северна Македонија), Медиа Дијалог и Младите за медиумите (Германија), Нов европски граѓански форум (меѓународна организација), кои се организации основачи на глобалната иницијатива #DefendingDemocracy.
На настанот се најавени 16 говорници од Северна Македонија, Украина, Германија, Молдавија, Ерменија, Обединетото Кралство, и САД.
Конференцијата ќе се занимава со клучните прашања за иднината на Украина и поширокиот глобален одговор на војните на агресија и заканите од авторитаризмот, дезинформациите и хибридното војување. Дискусиите ќе ги истакнат позициите на Украина за неопходноста од праведен мир, што подразбира и барање за целосно ослободување на сите окупирани територии од 2014 година, како и непоколебливата поддршка од меѓународната заедница што ѝ е потребна на земјата за победа и долгорочна безбедност.
СЛОБОДНА ЗОНА
„Ова е сторија за тоа како изгледа кога кукавиците ќе се сретнат со херои и за неверојатното непочитување кон Украина. Америка сега стои на крстопат: Ќе застане ли со Зеленски или ќе се сврти кон тираните? Или, со други зборови, во овој момент на борбата за слобода, изборот на Америка (и светот) е помеѓу демократијата или покорување кон тиранијата.“, пишува Џабир Дерала во колумната „ Кога кукавиците се соочуваат со херои: „За три дена. Го слушнав тоа од Путин.“ – аларм за будење на Америка и светот“.
Подготви: Д. Тахири
