ВЕСТ НА ДЕНОТ
ЕК утре ќе го усвои Пакетот извештаи за напредокот во процесот на проширување
Европската комисија на утрешното заседание на Колеџот на комесари треба да го усвои Пакетот на извештаи за 2024 година за напредокот на европскиот пат на земјите кандидати за членство во ЕУ.
Како што информира денеска портпаролот на Еврокомисијата, Стефан де Керсмакер, Пакетот ќе вклучува извештаи за напредокот на 10-те земји опфатени со процесот на проширување, вклучително и Северна Македонија.
По усвојувањето на пакетот, тој ќе биде официјално презентиран од страна на високиот претставник за надворешна политика и безбедност Жосеп Борел и еврокомесарот за проширување и соседска политика Оливер Вархеји.
ИЗЈАВА НА ДЕНОТ
-Го добив писмото, го прочитав. Писмото би го поделил во два дела, првиот дел е геостратешки осврт на состојбата во регионот, вклучително Блискиот Исток и Украина, додека вториот дел е обвинување на уставните судии коишто ги избрало мнозинството на СДСМ и на ДУИ дека спроведуваат програма на ВМРО-ДПМНЕ. Не сум знаел дека овие судии избрани од мнозинството на СДСМ и ДУИ спроведува програма на ВМРО-ДПМНЕ, дека бил загрижен за предметот поврзан со законот за јазици и да сум интервенирал кај уставните судии избрани од СДСМ и ДУИ да внимаваат што прават бидејќи на тој начин можеле да ја дестабилизираат државата. Тоа е писмото, јавноста нека оцени дали тоа заслужува коментар, рече Мицкоски, одговарајќи на новинарски прашања пред конференцијата „Блумберг Адрија“.
СВЕТ
ОДБРОЈУВАЊЕ, 7 дена до изборите во САД: Харис вечерва со клучен говор во Елипса паркот пред Белата куќа
Уште седум дена останаа до претседателските избори во САД, уште толку интезивна изборна кампања на двајцата кандидати, потпретседателката Камала Харис и поранешниот претседател Доналд Трамп.
И додека Трамп не престанува со засилена реторика на омраза, навреди, закани и исмејувања, од Харис се очекува до крај да остане на демократското ниво за кои се бори.
ГРАЃАНСКА АКЦИЈА
ПРАШАЊЕ НА ДЕНОТ: Чија е заслугата за проектот „Бехтел и Енка“ и како ќе се спроведува во иднина?
СЛОБОДНА ЗОНА
„Ова и не е многу зачудувачки, ако се земе предвид дека и вицепремиерот и министер за односи меѓу заедниците во владата на Мицкоски, претседателот на Демократската партија на Србите во Македонија, Иван Стоиљковиќ учествуваше во 2013 година на Безбедносен форум во Русија, каде обраќање имал и рускиот претседател Владимир Путин. Од објавените фотографии од овој настан, може да се забележи дека Стоиљковиќ бил во друштво на тогашниот директорот на српската Безбедносна-информативна агенција, и сегашен министер за Русија во српската влада, Александар Вулин, како и претседателот на Република Српска, Милорад Додик“, пишува Драган Мишев во анализата „Остатоците од Отворен Балкан, закачени на српската локомотива – поставенa на колосекот кон БРИКС“.
*
„Во контекст на европскиот политички дремеж, мора уште еднаш да се нагласи долготрајноста и подмолниот карактер на руските хибридни операции. Руската хибридна агресија на европско тло се одвиваше и сѐ уште се одвива преку добро разработени мрежи кои вешто и ефикасно ги користат демократските стандарди и (да!) европските јавни пари – во своја корист. Тие со децении се вгнездуваат во демократските системи и го менуваат однесувањето на луѓето, најчесто користејќи ги токму јавните пари на даночните обврзници во демократските општества на Западот. Но тоа за Кремљ никогаш не било доволно“, пишува Џабир Дерала во анализата „Дремежот на политичките елити: Хибридната војна на Русија – закана што Европа не смее да ја игнорира“.
*
„Телефонски монолог за кој, не навлегувајќи во јазичните и интерпункциските недоследности во ова негово јавно обраќање, останува да се констатира дека во неговото казание има и една голема недореченост во делот каде што би требало да стои инфото за тоа што пак Бојко му реплицирал на нашиот премиер, дали софискиот соговорникот само понизно молчел и слушал или сепак имало дијалог па, прашањето во оваа една реченица, прашање во кое се насетува одговорот макар тоа премиеровиот соговрник го премолчел е идентичен како и досега дека без ЕУ друштвото, и од Борисов, и од било кој друг и други оттаму, и натаму ќе си добиваме корпи па затоа и ова телефонско рандеву додворување на македонскиот премиер кај бугарскиот претендент премиер е само уште едно – џабе“, пишва Зоран Иванов.
Д. Муратов
