ТЕМА НА ДЕНОТ
21 септември -Меѓународен ден на мирот
Денеска се одбележува Меѓународниот ден на мирот. Темата за оваа година е Акции за мир: Нашата амбиција за #Глобални Цели. Генералниот секретар на Обединетите нации, Антонио Гутереш рече: „Денес е потребен мир повеќе од кога било. Војната и конфликтите ослободуваат пустош, сиромаштија и глад и истеруваат десетици милиони луѓе од нивните домови. Климатскиот хаос е насекаде. Па дури и мирот земјите се зафатени од нееднаквости и политичка поларизација“.
Мирот не се посакува, мирот е нешто што се создава. Мирот е љубов, љубовта е мир. Мирот е напотребен на децата. Мирот, слободата и еднаквоста се вредности кон кои стреми светот. Мирот е наша одговорност пред идните генерации и тоа е она што ќе не води кон посветла и поодржлива иднина. Бескомпромисно, директно и решително да се бориме против сите закани за мирот во светот, порача тимот на ЦИВИЛ по повод Меѓународниот ден на мирот.
ИЗЈАВА НА ДЕНОТ
„Зајакнувањето на владеењерто на правото е од суштествена важност земјата да напредува на својата патека кон членството во ЕУ. На таа патека нема кратенки, нема компромиси. Успешноста на овој проект нема да зависи од посветеноста на партнерите, иако таа е важна, нема да зависи од квалитетот на експертизата или дадените совети иако и тие се важни, туку ќе зависи од посветеноста на сите вклучени институции и на надлежните власти со решителни чекори да напредуваат во владеењето на правото. Тоа е важно не само за проектот туку, пред се, и над се , тоа е важно за граѓаните. Но исто така од суштествена важност е земјата да напредува на својата патека кон членството во ЕУ, на таа патека нема кратенки, нема компромиси, нагласи евроамбасадорот Дејвид Гир, по повод официјалното отпочнување на проектот „Поддршка на ЕУ за владеење на правото“, чија цел е зајакнување на владеењето на правото во Република Северна Македонија.
ВОЈНА ПРОТИВ УКРАИНА
Украина и сите Украинци водат битка што не ја започнаа, ја бранат својата земја од војна што не ја сакаа и ги штитат своите деца од страдањето што никој не го заслужува и се обидуват да ги спасат од уште еден ужас на оваа војна – нивните присилни киднапирања од страна на Русија, изјави претседателот на Советот на ЕУ, Шарл Мишел во обраќањето на седницата Советот за безбедност на ОН во Њујорк.
*
Полскиот премиер Матеуш Моравјецки доцна синоќа изјави дека неговата земја повеќе не му доставува оружје на Кијив, бидејќи се фокусира на сопственото вооружување.
*
Претседателот Стево Пендаровски се обрати на отворената дебата за одржување на меѓународниот мир и безбедност на Советот за безбедност и порача дека најитната задача на Советот за безбедност е да биде проактивно ангажиран за ставање крај на војната во Украина.
ФЛЕШ ВЕСТИ
ПРАВОСУДСТВО Уставниот суд денеска едногласно одлучи да не поведе постапка за оценување на уставноста на Законот за ратификација на Конечната спогодба за решавање на разликите, познатa во јавноста како „Договорот од Преспа“ и ја отфрли иницијативата за оценување на уставноста на Указот со кој е прогласен овој Закон.
ОДЛУКА Министерката за култура, Бисера Костадиновска-Стојчевска денеска истакна дека Статусот на УНЕСКО останува, остануваат и препораките за негово зачувување, според одлуката на Комитетот за светско културно наследство на УНЕСКО.
ПРАВДА Министерот за правда Кренар Лога присуствуваше на последниот состанок на работната група која го подготвува новиот Закон за конфискација на имот во граѓанска постапка. Лога порача дека без Закон за конфискација на имот во граѓанска постапка не може да имаме борба против корупцијата и криминалот.
AL-PRESS
Редакциски избор од албански медиуми: Украинска новинарка побара признавање на косовската независност; САД нема да дозволат „Република Српска“ во Косово, Рама и Зеленски потпишаа декларација за безусловна поддршка за Украина
ЦИВИЛНИ АКТИВНОСТИ
ЦИВИЛ – Центар за слобода ги повикува сите граѓанки и граѓани, своите членови, поддржувачи, активисти, волонтери, како и граѓанските здруженија, политичките субјекти, да им се приклучат на сите мирољубиви луѓе ширум светот во одбележување на Меѓународниот ден на мирот со повици за мир, но и за правда во светот. ЦИВИЛ повикува на целосно повлекување на руските воени сили, до последниот војник и платеник, а потоа и целосно ќе се соочи со меѓународната правда за деструкцијата, воените злосторства и геноцидот што го спроведува против Украина. На Меѓународниот ден на мирот мора да се потсетиме колку лесно може да се наруши и распадне мирот во светот и да предизвика ужасни разурнувања и страдања. Руската агресија врз Украина ги дестабилизира светскиот мир и демократијата преку хибридните напади, уцената со енергенси и со храна, со жестоки пропагандни кампањи и дезинформации. Со тоа, Кремљ се обидува да ги скрие неизмерните насилства и очигледната намера за истребување на украинската нација, за што отворено и гласно говорат пропагандистите во руските државни медиуми.
Подготви: Б. Јордановска
