ВЕСТ НА ДЕНОТ
Починатиот политичкиот затвореник Навални беше трн во окото на Путин
Затворениот руски опозициски лидер и отворен критичар на Кремљ, Алексеј Навални, кој стана светски познат кога беше отруен со нервен агенс во 2020 година, почина на 47-годишна возраст, соопшти руската затворска служба.
Навални долго време беше трн во окото на претседателот Владимир Путин, откривајќи ја корупцијата на високи места, водејќи кампања против владејачката партија Единствена Русија и организирајќи некои од најголемите антивладини протести видени во последниве години, пишува Си-ен-ен.
ИЗЈАВА НА ДЕНОТ
Алексеј Навални се бореше за вредностите на слободата и демократијата. За своите идеали, Навални го жртвуваше најскапото. За ЕУ, одговорноста за неговата трагична смрт е целосно на рускиот режим, напиша на социјалната мрежа „Икс“ претседателот на Европскиот совет, Шарл Мишел по повод веста за смртта на рускиот опозициски лидер.
ФЛЕШ ВЕСТИ
ДИК Според роковникот објавен од Државната изборна комисија, државјаните кои се на привремена работа или престој во странство можат да се пријавуваат за гласање до 18 март во ДКП-та на нашата држава во земјите каде живеат.
ПРАВДА Поранешната пратеничка од ВМРО-ДПМНЕ, Силвана Бонева, која беше обвинета во случајот „Друмарина“, кој се однесуваше на патните трошоци, доби ослободителна пресуда.
ДКСК Новиот седумчлен состав на Антикорупциската комисија, кој на 8 февруари го почна мандатот за 2024-2029, има вкупно 581 предмет кои ќе ги распределат за решавање во претстојниот период. Од нив, 547 се преземени од претходниот состав на ДКСК, а 34 предмети се од 8 до 13 февруари.
КАМПАЊА Гугл наскоро ќе започне кампања против дезинформациите во пет земји-членки на Европската унија, изјавија од компанијата во пресрет на европските избори и новите и построги правила за онлајн содржините.
ЈСП Редовно сообраќаат автобусите на ЈСП „Скопје“, вработените денеска ќе ја добијат јануарската плата
ВОЈНА ВО УКРАИНА
Поддршката од САД со оружје и обука за Украина продолжува, од Германија пристигнува воена помош во вредност од 100 милиони евра.
*
Германскиот канцелар Олаф Шолц и украинскиот претседател Володимир Зеленски денеска во Берлин потпишаа договор за долгорочни безбедносни обврски.
АЛ-ПРЕС
Во Албанија, се формира федерацијата на здружена опозиција по принципот – различни, но со заедничка цел, за европска Албанија.
Институтот за наука и технологија во Косово денеска ќе одржи конференција за медиуми, по повод поднесувањето на тужбата и барањето за одложување на извршувањето на Решението на БЈБ, во Стопанскиот суд.
Како што е најавено, на оваа конференција ќе се одразат прекршувањата на Министерството за култура, млади и спорт и на Телото за преглед на набавки, поврзани со тендерот „Изработка на мастер план за меморијалниот комплекс „Адем Јашари“ вреден три милиони евра.
Ова се дел од темите од денешниот редакциски избор на ЦИВИЛ Медиа, од албанските медиуми во регионот.
СЛОБОДНА ЗОНА
„Во 2012 година, на 100 годишнината на албанската држава во Скопје дојдоа поранешниот премиер на Албанија, Сали Бериша и поранешниот претседател на Косово, Хашим Тачи и порачаа дека тие ќе бидат „гардиани“ (чувари) на Албанците во земјата. На собирот заедно со нив се обрати и Али Ахмети, претставуван како лидер на Албанците во земјата. Груевски тогаш како премиер, а ВМРО-ДПМНЕ како партија на власт, молчеа на сметка на партнерот ДУИ. Сега прагматично молчат и за Курти, на сметка на албанската опозиција“, пишува Сефер Тахири во колумната „Изборен двобој меѓу Курти и Рама“.
*
„За разлика од западните држави каде што слободата на изразување е неприкосновена вредност, контролата на информациите и наративите како концепт во Кина нема негативна конотација, туку се перцепира како легитимна алатка за постигнување на општествените цели, информирање и едуцирање на населението. Обединетиот фронт е органот на Кинеската комунистичка партија задолжен за унифицирање на пристапот кон пропагандата и негово интегрирање низ сите општествени полиња, како што се образованието, војската, медиумите, дури и приватниот сектор“, пишува Ана Крстиновска во анализата „Како кинеската пропаганда ја обликува перцепцијата за Кина во светот и кај нас?“.
*
… Мицкоски, секако доколку сака да е премиер што, патем, никогаш нема да биде, ќе треба да проголта не кнедли туку цели жаби, најбргу преку хранопроводот ќе мора да ги протурка и рамката нели бугарска и уставните и барањата на Беса, Алијансата и Алтернатива за компензација на тие 20% со Албанци во уставот и …, ќе мора да проголта и жаби и полжави живи, ќе мора тоа да го стори и за Рамковниот и за Преспанскиот и за Северна и за Бугарскиот и за …, и ќе голта, ќе голта ако сака да е премиер што сè уште му е крајно неизвесно“, пишува Зоран Иванов во колумната „Ќе голта, ќе голта ако сака да е премиер што сè уште му е крајно неизвесно“.
*
„Граѓанското собрание на Европа бара Европската политичка заедница да биде вистински политичка: на секој граѓанин на Европа да му овозможи граѓанство во ЕУ, ЕЕА, или да креира друга форма, согласно премисите на Европската политичка заедница. Само граѓаните, односно Собранието на граѓани на Европа може да даде легитимитет на политичката заедница, а не обратно.
Граѓанското собрание на Европа охрабрува разбирање на регионите според нивната физичка, економска и друга материјална блискост, наместо според технократската логика (на пример, Западен Балкан има помалку смисла отколку Југоисточна Европа и нејзините подрегиони)“, пишува Катерина Колозова во колумната „Формирано Граѓанското собрание на Европа: Европа не е цела ниту во цивилизациска ниту во безбедносна смисла, доколку не е интегрирана“.
Д. Муратов
