Тврдењето на власта дека народот денес живее побогато од порано предизвика лавина реакции. Наместо согласност, јавноста возврати со критики, сарказам и гнев – опишувајќи го како „навредливо извртена слика на реалноста“, одоговарајќи на ПРАШАЊЕ НА ДЕНОТ: Што мислите за тврдењето на власта дека народот живее побогато од порано?
„Власта живее премногу богато, а народот мизерува,“ велат многумина. Според нив, функционерите се збогатуваат од сиромаштијата на граѓаните, не придонесуваат за економијата и ретко се појавуваат на собраниски седници. „Се грижат само за лични интереси и патни трошоци,“ е еден од коментарите.
Граѓаните реагираат и на начините на комуникација: „Досадни, демоде, наметливи, папагалски – постигнуваат спротивен ефект.“ Некои забележуваат дека политичарите се слушаат само пред избори, а потоа „цел мандат крадат и спијат“.
Економскиот аспект е централна точка на незадоволството. „Ако платите се зголемат за 10%, цените растат барем за 50%. Како тоа живееме побогато?“ прашуваат читателите. Други додаваат: „И јас би живеел подобро со 2.500 евра плата плус тендерче.“ Предлогот што се повторува е функционерите да пробаат барем еден месец да живеат со плата на просечен работник – за да ја почувствуваат реалноста.
Се јавуваат и саркастични забелешки. „Следната изјава ќе биде дека ЕУ не е подготвена да нè прими за да не им го покачиме GDP,“ вели еден граѓанин. Друг додава: „Народот не живее – тој само игра улога во претставата „Живот“.
За многумина, суштината е јасна: властите си дозволуваат да ја потценат интелигенцијата на луѓето. „Владата си живее многу поубаво и ја потценуваат интелигенцијата на народот,“ гласи една од реакциите.
Меѓу пораките што се издвојуваат е и оваа: „Полн стомак на празен не верува. Нема потреба да се објаснува – тие никогаш нема да сфатат.“
