ВЕСТ НА ДЕНОТ
Разрешена в.д. директорката на „Козле“ која забрани да и се спомнува името
Министерот за здравство Арбен Таравари денеска потпишал решение за разрешување од функцијата на досегашната директорка на детската болница „Козле“, д-р Каролина Симоновска. На нејзино место е назначена професорката Катерина Бошковска.
– Министерството за здравство информира дека за нова директорка на УК за респираторни заболувања кај децата „Козле“ е именувана проф. д-р Катерина Бошковска, која над дваесет години е дел од тимот на оваа установа. Д-р Бошковска е супспецијалист по педијатриска пулмологија. Во рамки на наставно образовната дејност е вклучена во активностите на катедрата при УКИМ и во последните пет години има објавено голем број научни трудови. Министерството се заблагодарува за досегашниот ангажман на претходната директорка д-р Каролина Симоновска, се наведува во соопштението на МЗ.
ИЗЈАВА НА ДЕНОТ
„Во услови на зголемено руско мешање и обиди за влијание во Молдавија, Грузија и на Западниот Балкан, проширувањето на ЕУ станува директен предизвик за европската колективна безбедност. Да не се залажуваме, проширувањето сега веќе не е само благородна амбиција, сега, цврсто верувам, дека тоа е геополитичка неопходност. Сепак, за жал, во последнава деценија загубивме повеќе членки, отколку што примивме, рече претседателката на Европскиот парламент, Роберта Мецола во обраќањето на Годишната конференција на амбасадорите на Европската Унија, насловена „Надворешна политика на ЕУ што испорачува“, што се одржува во Брисел.
РЕГИОН
Највисоките казни што ги изрече оваа институција до 31 јануари се два случаи од по 20.000 евра. Еден за Демократската лига на Косово (ЛДК) и еден за коалицијата Алијанса за иднината на Косово, НИСМА, Конзервативци, Интелектуалци. Прекршувањата утврдени од страна на Панелот за претставки и поднесоци главно се однесуваат на прекршување на Кодексот на однесување на политичките субјекти.
СВЕТ
Кина возвраќа на воведените царини за кинескиот увоз на Трамп
Пекинг во вторникот објави широк пакет економски мерки насочени кон САД, возвраќајќи откако американскиот претседател Доналд Трамп воведе царини од 10 отсто на кинескиот увоз.
Новите давачки, објавени од кинеското Министерство за финансии, наметнуваат данок од 15 отсто за одредени видови јаглен и течен природен гас и тарифи од 10 отсто за сурова нафта, земјоделски машини, автомобили со голем обем и пикап камиони. Мерките стапуваат на сила на 10 февруари, објави Си-ен-ен, пренесува ЦИВИЛ Медиа.
ФОРУМ
ПРАШАЊЕ НА ДЕНОТ: Што мислите за протестите на српските студенти?
СЛОБОДНА ЗОНА
„Името и презимето на докторката блондинка која имаше сопствена замисла како функционира едно демократското општество и правото на слобода на информирање, веќе нема да се објавуваат во медиумите.
Добрата вила која и ја оствари желбата на сега веќе поранешната в.д. директорка е министерот за здравство, д-р Арбен Таравари. Со мало задоцнување, сепак, што би рекле нашите северни соседи „никад није касно, боље икад – него никад“, пишува Драган Мишев во колумната „Пази што посакуваш, може да ти се исполни: Веќе нема да се споменува името и презимето на в.д. директорката на „Козле“.
Д. Муратов
