ВЕСТ НА ДЕНОТ
Од МВР информираат дека денеска во утринските часови била експлодирана бомба во двор во скопската населба Керамидница, при што беше повреден Раде Трајковски – Штекли.
„Денеска (14.11.2024) во 09.20 ч. во дворно место во населба Керамидница во Скопје била фрлена експлозивна направа. Од експлозијата со повреди се здобил Р.Т., кој е пренесен во ГОБ „Св. Наум Охридски“ за укажување на помош. Се преземаат мерки за расчистување на случајот“, велат од МВР.
Ова е трет обид за негова ликвидација откако досега два пати во Ист Гејт пукале во него.
Од Јавното обвинителство информираа дека по наредба на јавен обвинител се обезбедуваат снимки од видео надзорот на објектите и дека подигнатите траги од местото на настанот ќе бидат предмет на вештачење.
ИЗЈАВА НА ДЕНОТ
Добро е што немаме животозагрозувачка состојба на никого во овој момент, лошо е што криминалните банди си „хараат“ и денеска, но, соодветно, одлучно и сурово како институции ќе одговориме на сите оние кои што го „реметат“ мирот на македонските граѓани, изјави министерот за внатрешни работи, Панче Тошковски, во врска со денешниот настан во кој експлозивна направа била фрлена во дворoт на Раде Трајковски – Штекли во скопска Керамидница.
РЕГИОН
Косовско обвинителство: Жртвите во Урошевац се нападнати поради тоа дека се Роми, Ашкалии, Египќани (РАЕ)
Основното обвинителство во Урошевац, Одделот за тешки кривични дела, побара од Основен суд во Урошевац, определување мерка притвор во траење од 30 дена против осомничениот Ф.И., за ранувањето на четири лица со нож, што во тој град во јужно Косово се случи минатиот понеделник, јави дописникот на МИА од Приштина.
Обвинителството соопшти дека тој е осомничен за кривично дело „тешко убиство во обид“.
Според соопштението на Обвинителството, Ф.И. на 11 ноември во 15 часот и 30 минути се обидел да им го одземе животот на две малолетнички, а кривичното дело било извршено намерно, бидејќи жртвите биле припаднички на малцинската заедница Роми, Ашкалии, Египќани (РАЕ) во Косово. Девојчињата, за кои медиумите јавија дека се на 10-годишна возраст, се движеле по улица, каде што напаѓачот им пришол одзади и ги ранил со нож од грб.
СВЕТ
„Добредојде назад“ – Бајден му честиташе на Трамп на заедничката средба во Белата куќа
Американскиот претседател Џо Бајден и новоизбраниот претседател Доналд Трамп се сретнаа во Белата куќа. Бајден го покани Трамп да се сретне со него како дел од долгогодишната традиција што означува трансфер на власта.
– Па, г-дине избран претседател, поранешен претседател, Доналд, рече Бајден додека Трамп седеше до него пред каминот во Овалната канцеларија. „Честитки“, додаде тојќ
„Добредојде назад“ му посака Бајден на Трамп, по што двајцата се ракуваа.
„Политиката е тешка и често не е многу пријатен свет, но денеска е убав свет и многу го ценам тоа“, одговори Трамп.
СЛОБОДНА ЗОНА
„Денеска судот речиси за никаква наводно клевета го принуди новинарот Џабир Дерала да му се извини на директорот за програма на ТВ Канал 5, Иван Мирчевски за наводна навреда во новинарски текст па ако е тоа правда нека е, човекот му се извинил извинетиот пресреќен, силна некоја сатисфакција од колега за колега ама прашањето на кое авторот на оваа една реченица не бара одговор зашто за кај нас нормално, нема да го добие ама гаи надеж барем дека поради прашањето нема да стаса на суд како колегата Дерала, отприлика гласи кога тоа не на Џабир, Бранко, Ема, Ерол, Данкс, Љубо и редица други, програмскиот на Канал пет тв и другите првенци уредници од македонските национални телевизии ќе им се извинат на граѓаните гласачи наместо да бидат брана за лагите како што и му доликува на новинарството…“, пишува Зоран Иванов во коментарот „Но еве, времево е баш погодно за покајување и извинување па нека се окуражат ако троа доблест имаат“.
Д. Муратов
фото: МИА
