ВЕСТ НА ДЕНОТ
Од струмичкиот затвор избегале 23 затвореници
Во моментов од Казнено-поправната установа Затвор Струмица во бегство се 23 затвореници, информира новоименуваниот в.д. директорот на затворот Зоран Ристов.
Во обраќање за затекнати состојби во КПУ Затвор Струмица, Ристов вели дека ова е резултат на неодговорното работење на претходни раководства.
Во изминатиов период во пракса било преку телефонски повик да се даде погодност на затвореник со зборовите „Јас стојам зад тоа“. Ваквите процеси во претстојниов период уредно ќе се истражат.
Оваа пракса во КПУ Затвор Струмица завршува и одговорност мора да следува. Прва моја задача е се врати достоинството и работниот имунитет на вработените, вели Ристов.
ИЗЈАВА НА ДЕНОТ
ВЛЕН: Интерпелацијата за Гаши е да се предизвика политички земјотрес и тест на владиното мнозинство
„Како и во секој политички експеримент, така и во интерпелацијата за Претседателот на Собранието, Африм Гаши, има неопходни елементи. Потребен е мотив како аеродромскиот инцидент. Потоа, координирано се креира хистерија во јавноста.
На фанфари се бара политичка одговорност. Се прави конструкција со обезбедувањето на Претседателот на Собранието. Левица е подносител на интерпелација, СДСМ е поддржувач, а ДУИ бара алиби за јавно да влезе во ова друштво и од страничен подбуцнувач да ја преземе улогата на политички координатор“, се наведува во соопштение од ВЛЕН.
РЕГИОН
Косовските Срби протестираа против отворање на мостот на Ибар
Во Северна Митровица, во близина на главниот мост на реката Ибар, денеска се протестот на припадниците на српската заедница кои се противат на неговото отворање за сообраќај.
На протестот, поранешниот судија од Северна Митровица, Никола Кабашиќ, рече дека мора да се постигне консензус меѓу сите претставници на Србите во Косово за да се идентификуваат и заштитат основните интереси на српската заедница, јавуваат косовските медиуми.
СВЕТ
Хамас го назначи Јахја Синвар за нов политички лидер
Хамас вчера објави дека Јахја Синвар, претпоставениот организатор на смртоносните напади на 7 октомври против Израел, е избран за нов политички лидер, консолидирајќи ја својата моќ над милитантната група додека таа ја продолжува војната со Израел.
Според Њујорк тајмс, Синвар ќе го замени Исмаил Ханије, кој беше убиен во експлозија минатата недела во Техеран. Хамас и Иран го обвинија Израел за атентатот, иако Израел јавно не презеде одговорност.
СЛОБОДНА ЗОНА
„Случајот на ФокусНет е катализатор каде се потврдуваат овие изреки, но и состојбите во правосудниот систем во кој граѓаните на Македонија живеат веќе повеќе од три децении.“, од Војо Маневски во колумната „Колку е бавна правдата?“.
„Денес, премиерот Мицкоски и министерот за внатрешни Тошковски се однесуваат како да се опозиција, а не власт. Доколку навистина има сериозни докази за можна дестабилизација на државата треба веднаш да се свика Советот за безбедност, а не да биде тема за пред кооперација со пиво, кикирики и салама.“, пишува Дехран Муратов, во колумната „Држава сме, контролираме!“.
Подготви: Д. Тахири
