ВОЈО МАНЕВСКИ
Правдата е бавна, ама е достижна. Вистината „врти, врти, ама секогаш излегува на површината“. Познати се овие изреки што се производ на човечкото искуство. Суштината е во поимот „време“ кое некогаш може да трае и колку еден продуктивен човечки живот. Трпението е најголем стратег, ама чини многу човечки судбини и големо количество нерви и непроспиени ноќи. (ПДФ линк до пресудата)
Случајот на ФокусНет е катализатор каде се потврдуваат овие изреки, но и состојбите во правосудниот систем во кој граѓаните на Македонија живеат веќе повеќе од три децении. Од очигледно надворешно влијание врз судскиот процес до нелогични и неправни делови на судските одлуки, па до пресуди кои покажуваат дека сепак примената на законот не се сведува на интерпретација на судиите, туку на законска обврска во чии рамки мора да се движат пресудите.
Овде мора да се каже дека и јавноста е неодминлива како помош во остварувањето на законските права на ФокусНет. Во прилогот од јуни 2023 година Соња Танеска детално го опиша движењето на предметот низ административните и судските ходници кое траеше над 20 години.
Цивил Медиа го објави и текстот за последните случувања поврзани со донесувањето на конечна пресуда во Апелационен суд Скопје.
Како потврда на изреките од почетокот на текстов се и информациите од крајот на минатата недела кога конечно странката ФокусНет е известена дека пресудата на Апелационен суд е законски процесуирана од Основниот суд Скопје и ќе биде службено доставена до странките по завршувањето на судската ферија.
Предметот носи број ТС-1136/23 и содржината нема да ја коментираме, но самиот факт дека Апелационен суд после две децении барем делумно ја исправа неправдата кон ФокусНет е доказ дека и другите слични предмети кои имаат долг временски период на движење низ лавиринтите на системот, можат да добијат завршница. Колку странките ќе бидат задоволни од пресудата е нивна работа и можат да бараат постапка пред Врховен суд, но фактот дека има пресуда која по сѐ изгледа ја потврдува пресудата на Вишиот управен суд за кршењето на законот од страната на Телеком, веќе е правен факт кој не смее да се заобиколи. Сѐ останато е работа на пресметки и експертизи кои не ја анулираат одлуката на Судот – дека сѐ мора да биде во рамките на законот. Ќе биде ли запаметен овој предмет како почеток на враќањето на довербата кон судовите како важни и кредибилни институции, зависи само од судиите во сите инстанци, вклучително и Врховниот суд. За почеток едно светло се појави на крајот од тунелот.
