ВЕСТ НА ДЕНОТ
Денеска се одбележува значајна пресвртница во историјата на ЦИВИЛ – Центар за слобода: 25 години непоколеблива посветеност на одбраната на човековите права, заштитата на демократијата и спротивставувањето на омразата, лагите и пропагандата.
Помина четвртина век од нашето основање. За тоа време испорачавме над сто успешни проекти, организиравме безброј настани и изградивме медиумска платформа која прерасна во важен јавен простор за политички дијалог и еден од темелите на општествениот дискурс.
Нашето патување е далеку од завршено, и ние со нетрпение ќе се соочиме со уште поголемите предизвици, но и достигнувања што се пред нас.
ИЗЈАВА НА ДЕНОТ
„Урбаниот транспорт е еден од главните фактори за аерозагадувањето, затоа утре шест електрични автобуси ќе бидат донирани на Градот Скопје, односно на ЈСП, додека пред одлука сме Владата да купи 100 до 120 електрични автобуси кои што потоа ќе бидат донирани на јавниот транспорт по општините“, најави првиот вицепремиер и министер за животна средина и просторно планирање Изет Меџити.
РЕГИОН
Се степаа пратениците од власта и опозицијата во српското Собрание, седницата прекината
Седницата на српското Собрание на која се расправа за Предлог-буџетот за 2025 година е прекината поради инцидент, туркања и физичка пресметка на пратениците од владејачката коалиција и опозицијата, јави дописникот на МИА од Белград.
До инцидент дојде кога пратениците на владејачката коалиција и на опозицијата дојдоа на говорницата држејќи транспаренти, по што имаше извици, меѓусебно туркање и фрлање хартии и вода.
СВЕТ
Европскиот совет даде „зелено светло“ на буџет на ЕУ за 2025 година
Советот на ЕУ денеска го одобри Предлог-буџетот на Европската Унија за 2025 година, кој беше усогласен меѓу претставници на Европскиот парламент и на земјите членки на 16 овој месец.
Со договорот, вкупните обврски на Унијата во годишниот буџет се утврдени на над 199,4 милијарди евра, а вкупните исплати на нешто повеќе од 155,2 милијарди евра. Дополнително, 800,5 милиони евра се наменети за реагирање на непредвидливи потреби.
ИНТЕРВЈУ
(ЕКСКЛУЗИВНО) Аднан Капо, Институт за геополитика, економија и безбедност, Сараево: За Западен Балкан единствено решение е Европска Унија и НАТО
Со изборот на Доналд Трамп за претседател на Соединетите Американски Држави, многу политички структури на Западен Балкан здивнаа со надеж дека ваквиот пресврт во демократската Америка, позитивно ќе влијаат на нивната ориентација кон Исток.
Во ексклузивното интервју за ЦивилМедиа, директорот на Институтот за геополитика, економија и безбедност од Сараево, БиХ, Аднан Капо, се осврна на неколку клучни прашања кои се однесуваат на Босна и Херцеговина, за регионот и, се разбира за глобалните прашања, директно и индиректно поврзани со одлуката на Американците за „Америка на прво место“.
