Колегата Џабир ми предложи да напишам некој збор за 24 години Цивил. Со задоволство го прифатив предлогот. Едноставно не можев да го одбијам човекот кој ме нарекува „мојот најомилен неистомисленик“, т.е. граѓанскиот активист кој ја лансираше симпатичната мантра „граѓанки и граѓани“.
Најпрвин, збор-два за Џабир како идеен творец на Цивил: Прв пат за него чув, кога пред 15-16 години во раце ми дојде една негова книга, која ја прочитав, и бев воодушевен од тоа како Џабир ги восприема културата, уметноста и граѓанскиот активизам.
По некоја година, кога тој стана сеприсутен на јавната и медиумска сцена во Македонија, малку се подзамислив, дали тој е истиот оној Џабир – автор на книгата што ја читав. Сепак, тој беше, ама со малку еволуирани ставови и погледи од оние во неговата книга. Добро, тоа е нормално и легитимно. Луѓе сме и во животот поминуваме во повеќе развојни фази (за да нема недоразбирање, слично чувствувам и за мене како активист и аналитичар).
Поминаа година-две и „ги вкрстивме копјата“ на дебата во ТВ21 при што тој „ребра ми кршеше“, а јас „џигери му вадев“. Очигледно, еве живи и здрави сме и двајцата – преживеавме. И кога ги преживеавме „детските болести“ на македонската демократија, следуваа случајни средби, срдечни ракувања и соработка во вид заедничко учество на јавна трибина организирана од Цивил, мое гостување во подкастот на Цивил итн.
Инаку, со голем дел од неговите залагања и активности во граѓанскиот сектор се согласувам – да бидам конкретен, кога се работи за демократијата, владеењето на правото и одбраната на човековите права. Кога станува збор за политиката, политичките актери и начинот на нејзиното практикување, имаме разлики, некогаш помали, друг пат и не така мали. Ама, нели е тоа првата цел и основната смисла на плурализмот и демократијата. Значи, ништо страшно – и двајцата почитуваме различности.
Да поентирам за Џабир: како граѓански активист го доживувам како релевантен и посебен. Како политички аналитичар е храбар (да заземе став и јавно да го соопшти), со потенцијал да постигне повисоко ниво. Тука еден совет: Никогаш повеќе да не држи говор на митинг на политичка партија или коалиција.
А сега нешто и за Цивил, „граѓанското чедо“ на Џабир Дерала. Моите комплименти за 24-те години дејствување и опстојување на јавната и медиумска сцена. Бидејќи веќе 15 години се бавам со брендови и брендинг (издадени еден толковник за брендинг, адвертајзинг и паблик рилејшн и пет книги), Цивил го опсервирам како брендолог.
Го доживувам како организација и медиум со специфична различност, посебност и оригиналност. Како во поглед на идентитетот, така и во смисла на имиџот. И како граѓанска организација и како медиум. Овој квалификатив е основен предуслов за оригинален бренд. Со едно појаснување: Цивил како граѓанска организација го оценувам како добро организирана, уште подобро позиционирана и влијателна организација. Цивил, пак, како медиум е отворен и дозволува демократски дијалог. Со желба да биде повлијателен, најдобронамерно советувам, проверување (на информациите и фактите и аргументите за нив), и на другата страна кога се објавуваат информации кои претендираат да бидат ексклузивни, скандалозни или афери што би рекол нашиот народ.
Нека ти се честити 24-те години Цивил, граѓанину Џабир Дерала. За тебе добро здравје, уште поголем активизам и долг живот, а за Цивил поголеми годишнини и јубилеи.
Секое добро за тебе и Цивил, од Сотир Костов.