ВЕСТ НА ДЕНОТ
„Гарантирани цени“ до крајот на годината, укината забраната за акции и промоции
До крајот на годинава ќе важи мерката за намалени цени на основните прехранбени производи и алкохолните и безалкохолните пијалоци што од 20 септември се продаваат со ознаката „гарантирана цена“, а укината е одлуката за забрана на акции и промоции од страна на производителите и дистрибутерите, одлучи денеска Владата.
– По вчерашната конференција и дискусија со трговците на мало и на големо и производителите, како и со помош на Стопанската комора на Северна Македонија за да нема заблуда во делот на трговијата, денеска, на предлог на Министерството за економија, укината е Одлуката во делот на акциите имајќи во предвид дека одредени трговци на мало ја толкуваа претходната одлука како неможност за давање акции и промоции. Тоа значи дека сега и производителите и дистрибутерите ќе може да организираат такви акции со цел да ги намалат цените за потрошувачите, изјави министерот за економија Крешник Бектеши.
ИЗЈАВА НА ДЕНОТ
Николовски: За граѓаните ЕУ е најдобра алтернатива, стравот од губење на идентитетот е зачинет со дезинформации
Мнозинството граѓани во земјава сметаат дека влезот во Европската Унија е добра работа и дека Унијата е најдобра алтернатива за државата, и дека односот е два спрема еден, што е позитивна бројка на која треба да се задржиме, вели Димитар Николовски, извршен директор на Евротинк – Центар за европски стратегии, во интервјуто за ЦИВИЛ Медиа.
„Имаме прилично добар невладин сектор што се бори против дезинформациите, меѓутоа се бори со едни чудовишта на пропагандата на кои и многу понапредни и подемократски општества од нашето не можат да се справат и да изнајдат решенија. Борбата против дезинформациите е еден долг процес и мора да се работи многу повеќе со граѓаните и со развивање на медиумската писменост кај граѓаните“, вели Николовски.
ФЛЕШ ВЕСТИ
ХИБРИДНИ ЗАКАНИ Министерот за надворешни работи, Бујар Османи, во рамки на официјалната посета на Финска, заедно со директорката на Европскиот центар за извонредност за справување со хибридни закани во Хелсинки, Теја Тииликаинен го потпишаа Меморандумот за пристапување на Северна Македонија кон споменатиот Центар, со што земјава стана 35-та земја учесничка.
ОДБРАНА Следната година влегуваме во процес на набавка на дронови за македонската Армија, рече министерката за одбрана Славјанка Петровска.
МИР Вкупно 76 европратеници испратија заедничко писмо до лидерите на Европската комисија и Советот на ЕУ со кое бараат од нив „да се заложат за итен прекин на огнот“ во Газа за да се овозможи хуманитарен пристап до цивилното население.
ГОВОР НА ОМРАЗА На мрежата Икс се појави фотографија од продавница за книги во Истанбул на чиј влез е истакнат натпис со антисемитска содржина на кој пишува дека влезот за „Евреите не е дозволен“. Ова потсетува на едно друго време, 1930-тите години од минатиот век и една друга држава (се мисли на нацистичка Германија), кога вакви натписи, со забрана за влез на Евреите, беа истакнувани на продавници, трамваи, училишта, и истите претставуваа злослутен предвесник на Холокаустот.
ВОЈНА ПРОТИВ УКРАИНА
Руската агресија врз населените места во повеќе региони во Украина продолжува и изминативе 24 часа. Според извештаите на Укринформ, во текот на изминатиот ден во регионот Запорижја извршени се 133 руски напади на 19 населени места. Убиени и повредение во руско гранатирање на Херсон, врз градот истрелани 33 проектили.
*
Руската пропаганда во окупираните украински територии – Донецк: Информативен вакуум и тривијални вести
Локалните канали во окупираниот регион Донецк не гледаат терористи и страсно ги поддржуваат „социјално блиските“ до нив – ХАМАС. Руската пропаганда никогаш не виде проблем да се преправа дека е „антифашистичка“ и во исто време да биде отворено антисемитска.
АЛ-ПРЕС
Вчерашната средба на Курти и Вучиќ со европските лидери ( Макрон, Мелони, Шолц, Борел и Мишел) во Брисел, заврши без резултати. Средбата е прва од овој тип по нападите на северот на Косово на 24 септември. Европскиот совет денеска ќе расправа за односите меѓу Косово и Србија во текот на вториот ден од самитот на Европската унија, пишуваат косовските медиуми.
Во Албанија, Специјалниот суд ја одобри мерката за безбедност за Сали Бериша, а двајцата адвокати се откажаа од одбраната, пишуваат албанските медиуми.
Ова се дел од темите од редакцискиот избор на ЦИВИЛ Медиа, од албанските медиуми во регионот, за денешното издание на АЛ-Прес.
СЛОБОДНА ЗОНА
„Доаѓаат избори. Да, се гледа тоа и во утринската програма на МТВ, особено како што сум забележал во нивните вести. И покрај тоа што вообичаено, секаде во светот (сега со кабловскиве барам имаме прилика да видиме) тие се речиси санитарно исчистени од политичка пропаганда и посветени на она што ни носи новиот ден (каде ќе нема струја, дали се проодни патиштата, временските прилики, какви културни настани ни носи денот) уредникот на вестите одлучил тука да опонира нешто што власта го издвоила претходниот ден.
Најидеален метод се анкетите. Тука на некој начин се користи советската школа на монтажа на атракции – секако во помалку амбициозен потфат – па ќе ги издвоите оние сегменти од изјавите кои ви одговараат“, пишува Љубомир Костовски во колумната „Да се победи робот во себе“.
*
„Група Палестинци од Газа ја преминаа границата на 29 април, 1956 година, за да ја ограбат жетвата на полињата на кибуцот Нахал Оз. Еден млад еврејски член на кибуцот, кој патролирал по полињата, Рои, се упати кон нив на својот коњ, мавтајќи со стап за да ги избрка. Палестинците го фатиле и го однеле во Појасот Газа. Кога ОН го вратиле, неговото тело било осакатено.
Моше Дајан, тогашниот началник на генералштабот на ИДФ, одржа посмртен говор на погребот следниот ден: „Да не ги обвинуваме денеска убијците. Каков аргумент имаме против нивната смртна омраза кон нас? Последните осум години живеат во бегалски кампови во Газа, додека ние, пред нивни очи, ја претвораме во наше наследство земјата и селата во кои некогаш живееле нивните предци. Вината за смртта на Рои не треба да ја бараме кај Арапите во Газа, туку кај нас. Како се случи да сме толку слепи, да одбиваме директно да погледнеме во нашата судбина и да ја видиме судбината на нашата генерација во сета нејзина бруталност. Заборавивме ли дека оваа група млади луѓе кои живеат во Нахал Оз го носат товарот на портите на Газа на своите плеќи?“, пишува Славој Жижек во анализата „Кој е виновен?“.
*
„Нашите телевизии и мноштво медиуми може благовремено и да си се престројат пред двојната немилост што може да ги закачи со излегувањето на вистината како стојат работите. Не чукање по гради и нагаѓање од нигде ништо или од горливи желби да биде вака или така, оти малкумина знаат само малку повеќе од другите. Бидејќи, ако медиумите ги поддржуваат кочничарите и практично, ја закочат работата кон ЕУ – дали добро им се пишува меѓу сите останати, а ако успее работата со ЕУ и покрај нивното соучество во кочењето, пак – дали добро им се пишува наспроти сите останати“, пишува Емилија Целакоска во колумната „Друг ги испорача „добрата“.
Д. Муратов
