Српската премиерка Ана Брнабиќ во официјална посета на Северна Македонија
Претседателот на Владата на Република Северна Македонија, Зоран Заев, денеска е домаќин на делегација од Република Србија предводена од премиерката Ана Брнабиќ. Посетата на Брнабиќ започна со отворањето на One Stop Shop на граничниот премин Табановце-Прешево.
Премиерите на двете држави Зоран Заев и Ана Брнабиќ на свеченоста на меѓуграничниот простор порачаа дека двете држави со новината го забрзуваат протокот на патници и стока, времето на чекање се намалува двојно, а се отвора и можност за подобра соработка на бизнис заедницата и интеграција на регионот. Брнабиќ, освен со Заев се сретна и со претседателот на Република Северна Македонија, Стево Пендаровски.
Почна средбата на работните групи за Законот за јавно обвинителство
Во Собранието попладнево се одржа средбата на работните групи од власта и опозицијата кои требаа да ги усогласат ставовите околу законот за јавно обвинителство со што треба да се реши идниот статус на Специјалното јавно обвинителство.
Средбата беше затворена, а на неа присуствуваа министерката за правда Рената Дескоска и Бојан Маричиќ, советник за евроатлантски интеграции на премиерот. На средбата присутни беа Соња Мираковска од СДСМ, а од ВМРО-ДПМНЕ Антонио Милошоски и адвокатот Тони Менковски. На средбата не се постигна напредок во разговорите меѓу власта и опозицијата иако законот утре влегува во собраниска процедура.
„Рекет“
„Донесувањето на законот за јавно обвинителство и водењето транспарентна, непристрасна истрага за случајот „Рекет“, се двете клучни работи кои многу ќе ни помогнат да добиеме датум за почеток на преговорите со ЕУ во октомври“, рече министерот за надворешни работи Никола Димитров, пред почетокот на Амбасадорски совет во МНР.
„Случајот „Рекет“ не е бенчмарк, а нема ниту да биде до октомври, ако државните органи продолжат со овој досега соодветен начин на третирање на случајот“, е ставот на претседателот Стево Пендаровски, кој исто така беше дел од Амбасадорскиот совет во МНР.
„Судството веројатно сфаќа дека можеби ја има последната шанса да ја врати довербата кај граѓаните со независна, целосна и брза истрага на случајот „Рекет“, но и на сите други случаи на СЈО. Судството треба да најде сила да му даде отпор на притисокот, независно од каде тој доаѓа, и за тоа има целосна поддршка од наша страна“, порача денеска евроамбасадорот Самуел Жбогар кој учествуваше на форум во Стопанската комора.
Советот за јавни обвинители утре ќе процени дали ќе започне постапка за разрешување на Специјалната јавна обвинителка Катица Јанева која во моментов е во притвор во затворот Скопје за предметот „Рекет“ на Основното јавно обвинителство за организиран криминал и корупција.
ФЛЕШ ВЕСТИ
Министерството за надворешни работи денеска и утре го организира годишниот Амбасадорски совет, што оваа година е тематски посветен на европската перспектива на Северна Македонија.
„Безбедност и здравје на работниците на работното место: национални услови и европски перспективи“, е темата на шестата сесија на Работната група 2 (Социјална политика и вработување – Поглавје 19) од Националната конвенција за Европската Унија во Република Северна Македонија (НКЕУ-МК)
ЗНМ, СЕММ и Стопанската комора ќе потпишат Меморандум за соработка за саморегулацијата на онлајн медиумите во Северна Македонија.
ЦИВИЛНИ АКТВНОСТИ
ЦИВИЛ интензивно продолжува со активностите на терен. Во текот на утрешниот ден тим на ЦИВИЛ ќе ги посети Гратско, Росоман, Кавадарци и Неготино. Целта на овие посети е промоција на проектот „Зелена иднина“ што ЦИВИЛ го спроведува во соработка со Хајнрих Бел – Сараево. На инфо-штандовите граѓан(к)ите на овие четири општини во директна комуникација со тимот на ЦИВИЛ ќе можат да ги споделат своите идеи и размислувања за социјалната правда, зелените вредности и антинационализмот, но и како тие се поврзани и влијаат на општествените промени.
МИСЛА
Правда, сепак, ќе има!
Криминалците успеваат долго да останат на слобода, живеејќи живот каков што само можат да посакаат вистинските бизнисмени од западните земји, кои мораат да работат најмалку по 10 часа дневно за да опстанат во суровиот свет на капитализмот. Овие газди овде можат да прават што сакаат затоа што цела држава им е на располагање, пишува Џабир Дерала.
Биљана Јордановска
Останати автори: Ангела Петровска, Маја Ивановска, Џабир Дерала и Дехран Муратов
