ВЕСТ НА ДЕНОТ: Експресно разрешен поглаварот на ИВЗ, Сулејман Реџепи
Ријасетот на Исламската верска заедница на РСМ со 2/3 мнозинство донесе одлука за разрешување на Реисот Сулејман Реџепи од функцијата. До подготвување на нови избори, вршител на должноста ќе биде гостиварскиот муфтија, Ефенди Шаќир Фетаху. Одлуката за разрешувањето на Реџепи стапува во сила денеска.
ИЗЈАВА НА ДЕНОТ: Димитров: Потребни се солидарност и соработка за надминување на последиците од пандемијата
-На сите ни е јасно дека само преку координиран пристап проткаен со солидарност, соработка и несебична размена на знаења и добри практики ќе ги пребродиме последиците од иницијалната криза предизвикана од пандемијата на Ковид-19, изјави министерот за надворешни работи Никола Димитров во обраќањето на видео-конференција на Советот на Јадранско–јонската иницијатива и министерски состанок на Стратегијата на ЕУ за Јадранско-јонскиот регион (ЕУАСИР), чиј главен фокус беше координацијата во справувањето со последиците од пандемијата со короната.
– Претставува задоволство што на денешнава конференција во рамки на овој важен форум за регионална соработка и промоција на ЕУ интегративните процеси, кон кој пристапивме пред две години, е потенцирана и убавата симболика со одлуките на Советот на ЕУ во март годинава за почеток на пристапни преговори со Северна Македонија и Албанија, чие натамошно ефектуирање ќе биде во фокус и на претстојното словенечко претседателство со Иницијативата, нагласи Димитров.
КРАЈ НА ПОЛИЦИСКИОТ ЧАС: На вчерашната седница Владата донесе одлука од денеска да престане важењето на забраната за ограничено движење, а угостителските објекти да почнат да работат од утре. За угостителските објекти се прецизирани протоколи во зависност дали се затворени или имаат тераси.
Одлуката за попуштање на мерките е донесена врз основа на исполнети услови, анализа и стручно мислење на епидемилозите од Комисијата за заразни болести, како што изјави премиереот Оливер Спасовски на прес конференцијата на којашто се соопштија одлуките од седницата.
СОСТОЈБА СО КОВИД-19: Денеска Институтот за јавно здравје регистрира 17 оздравени пациенти и тоа 11 во Скопје, 4 во Куманово, 1 во Тетово и 1 во Велес.
На Клиниката за инфективни болести и фебрилни состојби почина пациент од Струга (58г) и пациент од Скопје (47г) и двајцата долго време поставени на механичка вентилација. Во ГОБ „8 септември“ почина пациент од Тетово (41г) хоспитализиран на 19 мај.
Во последните 24 часа направени се 622 тестирања, а регистрирани се 25 нови случаи на ковид-19 и тоа: 14 во Скопје, 2 во Куманово, 4 во Штип, 1 во Прилеп, 2 во Тетово, 1 во Струга и 1 во Велес.
Досега во земјата се направени вкупно 26.463 тестирања. Од вкупниот број направени тестови во изминатото деноноќие, 251 тест е во рамките на скринингот во градинки и геронтолошки установи. Тестирањата се направени преку Центрите за јавно здравје во Кочани, Куманово и Скопје, а регистриран е еден позитивен случај во геронтолошка установа во Скопје. Досега, преку скрининг, направени се 2.680 тестирања, а регистрирани се вкупно три позитивни случаи на вирусот.
Вкупната бројка на дијагностицирани во нашата земја од почетокот на епидемијата изнесува 2039, бројката на оздравени пациенти е 1.470, на починати е 119, а во моментов бројот на активни случаи во земјата изнесува 450.
НЕПОЧИТУВАЊЕ НА ПОЛИЦИСКИОТ ЧАС: Против вкупно 21 лице Основното јавно обвинителство Скопје денеска поднесе предлози за издавање казнени налози заради непочитување на полицискиот час.
Според ЈО, обвинетите не постапиле согласно Одлуката за забрана и посебен режим за движење на територијата на Република Северна Македонија и биле затекнати како се движат на различни локации за време на полицискиот час. ЈО предложи парични казни од по 100 дневни глоби со висина на дневната глоба од 20 евра во денарска противвредност.
ФЛЕШ ВЕСТИ
АНТИКОРУПЦИСКА (ДКСК) ќе упати барање до Државниот просветен инспекторат (ДПИ) да изврши вонреден инспекциски надзор за примената на Законот за високото образование и Статутот на Универзитетот „Св. Кирил и Методиј“ во однос на постапката за избор на ректор на УКИМ, за избор на претседател на Сенатот и да преземе мерки согласно своите надлежности.
*
АНТИКОРУПЦИСКА (Државна комисија за спречување на корупцијата), во врска со дивоградбите на крајбрежјето на Охридското езеро, ги повикува Владата во соработка со надлежните институции, Министерството за транспорт и врски, Државниот градежен инспекторат, Министерството за животна средина и просторно планирање и Управата за заштита на културно наследство, да постапат согласно регулативата и да ја применат преку конретни мерки и активности.
*
Министерството за економија ќе ја разгледа, но и ќе ја обжали одлуката на Управниот суд за „Еуромакс“ во други инстанци зашто е убедено во исправноста на раскинувањето на концесијата, соопшти денеска министерот Крешник Бектеши.
*
Со завршување на вонредната состојба, продолжуваат сите изборни дејствија. Одлуката е на претседателот дали ќе продолжи. Ние до крајот на неделата мораме да ги завршиме тие анализи и да одлучиме дали ќе бараме или не продолжување на вонредната состојба, изјави денеска премиерот Оливер Спасовски во одговор на новинарско прашање дали укинувањето на рестриктивните мерки значи и дека ќе се укине вонредната состојба.
ИЗЈАВА БЕЗ ИЗЈАВА: Чулев не одговори на прашањата од ЦИВИЛ Медиа
Во пресрет на денешната прес конференција на техничкиот министер за внатрешни работи Наќе Чулев, ЦИВИЛ МЕДИА постави 9 прашања. Техничкиот министер за внатрешни работи, Наќе Чулев не даде конкретен одговор на ниедно прашање од ЦИВИЛ Медиа. На самиот крај на прес конференцијата, Чулев ги скрати и обопшти прашањата и одговори:
„Она што сакам да ве информирам е дека Министерството за внатрешни работи на најтранспарентен начин ја информира јавноста во врска со сите случаи од делот на Министерството за внатрешни работи, и за наведените случаи Министерството за внатрешни работи веднаш презема активности во соработка со Основното јавно обвинителство со цел идентификување на лицата инволвирани во настанот и со поднесување на соодветни поднесоци во соработка и координација со Јавното обвинителство, а во однос на евентуално непостапување на полициските службеници надвор од овие протоколи и правилници констатирам дека како Министерство за внатрешни работи постапува одделот за внатрешна контрола, криминалистички истраги и полициски стандарди, и како и што сме правеле до сега штом се завршат овие истраги значи ќе биде јавноста благовремено информирана.“
СЛОБОДНА ЗОНА
Тема на денешната колумна на Сашо Орданоски „Огромна брука за САД“, е неуспешното справување на САД со пандемијата.
-Американскиот проблем, се разбира, не е само во големината на бројките на починатите. Подмолноста на ковид 19 го изненади целиот свет и може да се тврди, особено ако се „игра“ со споредбените и сè уште некомплетни статистички податоци, дека и многу други земји поминуваат лошо или и полошо во справувањето со вирусот. Светот уште долго ќе се занимава со анализите за поставеноста и структурите на здравствените системи и здравствените политики, како и со тоа кој, како и кога можел и требал да предвиди, да преземе, да одлучи, да пресече, да делува…
Д. Тахири
