Џафери останува на ставот дека Парламентот не може да се свика откако ќе биде распуштен
Претседателот на Собранието, Талат Џафери, како што посочи на денешната средба со новинарите, најновите информации говорат дека во Шпанија Владата би можела да биде формирана во наредниот период, а протоколот за членство на земјава во НАТО да биде ратификуван во јануари. Тоа, потенцира Џафери, остава простор во протоколот да биде ратификуван во Собранието на Република Северна Македонија пред биде распуштено заради одржување на изборите.
Распуштен Парламент, вели, не може да се свика без оглед што мандатот на пратениците трае до избор на нови. По распуштањето, потенцира Џафери, не може и не би требало да се врати назад затоа што со Устав е пропишано во случај на потреба кој ги има надлежностите, а тоа е претседателот на државата до избор на нов парламентарен состав.
Тимови од земјава работат на комплексни задачи во спасувачките акции во Албанија
Тимови составени од 42 припадници на републичките сили за заштита и спасување, координирани од Дирекцијата за заштита и спасување, согласно со одлуката на Владата, се во Албанија за да помогнат во спасувачките акции на локалните власти. Од доцна синоќа тимовите на републичките сили – тим за заштита од урнатини на ДЗС, преку офицерот за врски добиваат комплексни задачи за прва помош и извлекување на настраданите граѓани во Драч, како и во санирање на штетите од катастрофалниот земјотрес.
Советот на Град Скопје, пак, на денешната седница едногласно ја донесе Одлуката за давање помош на настраданите од катастрофалниот земјотрес во Република Албанија. Со оваа одлука, како израз на солидарност за настраданите, Градот Скопје дава помош во износ од 3 милиони денари.
Исто така, Црвениот крст на Република Северна Македонија ја испрати првата хуманитарна помош во материјални добра во вредност од 20.000 евра и 10.000 евра парични средства во Албанија и таа веќе раните утрински часови веќе присигнала во градот Драч.
Фетаи: Ние сме само магационери и архивари на предметите што се во фаза на истраги
„Предметите на Специјалното јавно обвинителство (СЈО) во фаза на истрага кои беа преземени од редовното обвинителство седат во кутии и поради тоа некои осомничени лица за измами и злоупотреби место да бидат на обвинителна клупа во судница, тие делат правни совети како треба да се води истрага за надоместоците во СЈО“, изјави денеска обвинителката Фатиме Фетаи одговарајќи на новинарско прашање пред одржувањето на судското рочиште за „Монструм“.
ФЛЕШ ВЕСТИ
Почувствуван земјотрес во Скопје со епицентарот во Грција во 08:23 часот наутро
Во Албанија денеска е прогласен Ден на жалост поради жртвите во серијата земјотреси во кои загинаа најмалку 29 лица, а повеќе од 600 се повредени. Знамињата на сите институции во Албанија утре ќе бидат спуштени на половина копје, а училиштата ќе бидат затворени
Министерството за финансии најави дека ќе се обезбедат средства за пречистителната станица за отпадните води од Скопје
На 14 декември голема акција за чистење, администрацијата ќе го одработи 2 јануари
Премиерот Зоран Заев во Сараево ќе ја прими меѓународната награда „Иса Бег Исхаковиќ“ и признанието „Во потрага по пријател“
МИСЛА
„На еден парадоксален начин, денеска е задоволство кога слушаме здодевни интервјуа по медиумите со Никола Димитров или со Бујар Османи, дури без разлика и на трилерот на толкувањето во „кристална топка“ на француската импровизација од политика кон Западниот Балкан“, за добро утро со Сашо Орданоски или „Надворешнополитичко зевање“
Биљана Јордановска
во соработка со Дијана Тахири, Маја Ивановска, Петар Клинчарски и Сашо Орданоски