Новите министри
Собранието на Република Северна Македонија синоќа доцна, по многучасовна расправа ги изгласа новите министри предложени од премиерот Зоран Заев. Насер Нуредини ќе раководи со Министерството за животна средина, Горан Милевски со Локална самоуправа, Садула Дураки со Политички систем, Трајан Димковски со Земјоделие и Хусни Исмаили со Култура. Премиерот Заев изјави дека промените за реконструкција на Владата се до не повеќе осум луѓе, затоа предложиле промена на седум. Тој најави дека промените ќе продолжат и во други институции, на централно ниво, на подрачни единици, јавни институции…
МВР акција
Министерството за внатрешни работи утрово уапси десетмина граѓани по налог на Обвинителството за организиран криминал и корупција. Поголем број од нив се вработени во Министерството за транспорт и врски. Тие од ОЈО се обвинети за злоупотреба на службена положба и овластување. Акцијата е резултат на неколку месечна сеопфатна предистражна постапка. Меѓу осомничените има поранешни високи функционери, административни службеници и лица кои вршат работи од јавен интерес.
Промена на полот
Министерството за здравство соопшти дека оперативен зафат за промена на полот нема да постои на сметка на Фондот за здравствено осигурување и таков зафат нема да се изведува во јавна здравствена установа. Оваа одлука доаѓа по лавината реакции по изјавата на министерот за здравство Венко Филипче, дека операциите за промена на полот ќе бидат на сметка на Фондот за здравство и дека нема да се плаќаат приватно како досега.
Гласање и гласови
Изложбата „Гласање и гласови“ – постери од швајцарските кампањи од 1918 до денес на Museum für Gestaltung Zürich што вчера се отвори во Музејот на Современа уметност во Скопје го одбележи почетокот на проектот поддржан од Швајцарија „Поддршка за изборните реформи во Северна Македонија“. Овој проект има за цел да ги поддржи демократските и веродостојните изборни процеси кои го олеснуваат политичкото учество и социјалната интеграција со тоа што на гласачите им овозможуваат да ги изберат своите претставници и од нив да бараат отчетност.
ЛГБТИ заедница
Во Македонија оваа година за прв пат ќе се одржи Парада на гордоста, на 29 јуни, која ќе започне од паркот Жена борец во 12 часот и ќе се движи кон Градскиот парк. На крајната точка, Школка во Градски парк, ќе настапат дрег кралиците Линда Социјалиста и Каја Мор. Покрај предвидените обраќања, ќе има и музичка програма во која ќе учествуваат Тамара Тодевска, Принцез Донатсу и диџеите Ивана Драгшиќ, Зоки Бејбе, Ири Скреч, Ана Мало и Узун Баба.
Она што одбележа месецот на гордоста, зоткако се објави за првата Парада на гордоста во Скопје, говор на омраза и хомофобија…
Кочо Андоновски, еден од организациониот одбор на Парадата, изјави дека и покрај тоа, тие добиле голема поддршка.
,,Откако објавивме дека ќе го одржиме првиот Скопје Прајд, евидентни беа обидите со омраза да се засени пораката за еднаквост и да се потцени можноста за зголемување на свесноста за хомофобијата, трансфобијата и бифобијата. Но и покрај тоа, добивме голема поддршка и многумина нè контактираат да ни кажат дека ќе дојдат со нас на 29-ти јуни, да го изодиме маршот – во спомен на сите борци за човековите права на ЛГБТИ заедницата во минатото, со поддршка на сите маргинализирани групи и борци за човековите права во оваа дестабилизирана сегашност и со идеја за општество каде сите ќе се еднакви – за идните генерации“, изјави Андоновски.
Б. Јордановска
