ВЕСТ НА ДЕНОТ: Напредокот на Предлог-законот за Јавно обвинителство
Собраниската Комисија за европски прашања на продолжението на денешната седница усвои десет амандмани поднесени на Предлог-законот за јавно обвинителство. Како што информира претседателот на Комисијата, Артан Груби, претстои усогласување на работните групи за преостанатите 41 амандамани. Комисијата во текот на денешниот ден ќе продолжи со расправата по амандманите, која може да трае најмногу два работни дена.
Советот на јавни обвинители денеска едногласно одлучи дека се исполнети условите за почнување постапка за разрешување на специјалната јавна обвинителка Катица Јанева, која е во притвор како осомничена за случајот „Рекет“.
Претседателот на Советот на ЈО, Коле Штерјев по седицата изјави дека ќе биде изготвен извештај кој ќе биде доставен до Собранието, кое понатаму треба да ја продолжи постапката за разрешување на Јанева.
ФЛЕШ ВЕСТИ
Се одржа првиот состанок на Работната група формирана од министерот за внатрешни работи по заклучок на Владата на Република Северна Македонија, која има задача да спроведе анализа на тековната состојба, да утврди конкретен модел за спроведување на процесот на проверка (ветинг) на вработените во Министерството за внатрешни работи. Министерот очекува траспарентен, инклузивен и објективен ветинг.
Судењето за насилствата пред Општина Центар во јуни 2013 година продолжува на 10 септември, откако денешното рочиште се одложи поради ситуацијата со специјалната јавна обвинителка Катица Јанева, која е во притвор за случајот „Рекет“.
На Универзитетот „Св. Кирил и Методиј“-Скопје денеска и утре е првиот рок за упис во прва година додипломски студии во учебната 2019/2020 година. Според Конкурсот на УКИМ, слободни се вкупно 10 710 места. Од нив, во квотата за редовни студенти има 5402 места, во квотата за редовни со кофинансирање на студиите 4273 и за вонредни студенти слободни се 1035 места.
ЦИВИЛни активности
ЦИВИЛ најавува голема септемвриска конференција за изборни реформи. На конференцијата поканети се сите партии, но и сите други засегнати страни, да учествуваат на оваа Конференција, согласно со форматот предложен и во апликацијата за учество. ЦИВИЛ ќе покани релевантни експерти и претставници на граѓанското општество и меѓународната заедница. Учеството е можно само преку пополнување онлајн апликација.
Денеска во Стара скопска чаршија, ЦИВИЛ на инфо-штанд го претстави проектот „Зелена иднина“ кој го спроведува во соработка со Хајнрих Бел од Сараево.
Тимот на ЦИВИЛ Медиа направи интервју на две големи теми: локални политики и практики со акцент на зелените политики, додека во вториот дел се осврнуваме на актуелните политички состојби во земјата со градоначалникот на Општина Кавадарци, Митко Јанчев. Во првиот дел од интервјуто Јанчев упати критика до Министерството за екологија од кое очекува во иднина повеќе да се залага за заштита на она што го имаме, а потоа да почнеме да градиме и да го доградиме тоа што треба.
МИСЛА
Улогата на Катица Јанева во аферата „Рекет“
Наместо да биде чувар на правото и правдата, таа стана заштитник на криминалот и корупцијата во државата! Можеби проблем беше тоа што немаше кој да го контролира „стражарот!“ Обвинител(к)ите од СЈО се огласија и почнаа да се оградуваат од нивната шефица и да изнесуваат критики на нејзината работа дури откако таа беше притворена!, пишува денешниот колумнист на ЦИВИЛ Медиа, Коста Стоименовски.
Биљана Јордановска
Останати автори: Дехран Муратов, Ангела Петровска, Коста Стоименовски
