Садула Дураку стана и вицепремиер
Министерот за политички систем и односи меѓу заедниците, Садула Дураки од ДУИ, е назначен за вицепремиер во Владата на Зоран Заев. Одлуката за унапредување на Дураки беше донесена на вчерашната владина седница. Тој доаѓа на местото на разрешениот сопартиец Хазби Лика, кој беше министер без ресор и вицепремиер за спроведување на Рамковниот договор и политички систем.
До реконструкцијата на Владата на крајот од минатиот месец, Дураки беше министер за животна средина и во оставката до премиерот Зоран Заев се пофали дека многу мали и големи проекти спроведени од страна на министерството, во време на неговото раководење со истото, ќе остават траен позитивен белег во зачувување и унапредување на животната средина.
Нема одложување на затворската казна за Кочан
„Во однос на предметот од обвинителството означен како „Труст“, ја информираме јавноста дека молбата за одлагање на извршувањето на санкцијата е одбиена како неоснована и истата е доставена до странките во постапката“, соопшти Кривичниот суд.
Кочан има упатен акт да се јави во казнено-поправна установа на 17 јули на издржување на затворската казна. Тој е правосилно осуден на 4 години и 8 месеци затвор во предметот на СЈО „Труст“ за добивање на незаконски тендер од 2011 година распишан од државната фирма „Електрани на Македонија“ (ЕЛЕМ) за ископување јаловина и јаглен од рудникот Суводол во Битола.
Заев: Очекуваме датум во октомври, проширувањето може да оди паралелно со реформите во ЕУ
Премиерот Зоран Заев очекува дека ветувањето за јасна поддршка за старт на преговорите во октомври оваа година ќе биде исполнето и оти земјава ќе добие датум за нивно започнување. Реформите во ЕУ, смета тој, можат да бидат паралелен процес со процесот на проширување со земјите од регионот.
„Таквата одлука ќе ја потврди кредибилноста на ЕУ во регионот и ќе биде препорака за земјите со кандидатски статус да ги продолжат реформите за остварување на европските стандарди и за да се охрабрат политиките што ќе им донесат просперитет, демократија и стабилност во регионот. Ја разбираме и ја поддржуваме дебатата за реформи во ЕУ, но убедени сме дека тој процес може да оди паралелно со процесот на преговори и за проширување со земјите од регионот“, истакна во своето обраќање премиерот Заев за време на работниот појадок на Самитот за Западен Балкан во Познањ.
Рот побара брзо отворање на пристапните преговори со Северна Македонија и Албанија
На самитот на Западен Балкан што се одржува во полскиот град Познањ германскиот министер за Европа Михаел Рот изјави дека Берлин го поддржува процесот за пристапување на сите шест земји од регионот во Европската Унија.
“Сите ние сме одговорни да обезбедиме тој процес и да заврши“, рече Рот кој побара брзо отворање на пристапните преговори со Северна Македонија и Албанија.
Почна изградбата на првата социјална зграда во Пробиштип
Почна изградбата на првата социјална зграда во Пробиштип, што треба да се изградиза 18 месеци, а во неа да се вселат 48 семејства од социјално ранливите категории. Министерот за транспорт и врски, Горан Сугарески, директорот на АД за станбен и деловен простор, Кристијан Трајковски и градоначалникот на Општина Пробиштип, Драган Анастасов денеска присуствуваа на официјалниот почеток на изградбата на зградата, која ќе чини околу еден милион евра.
Министерот Сугарески додава дека во соработка со АД за станбен и деловен простор оваа година ќе започнат со изградба на социјални згради и во Гевгелија, Виница, Пехчево, Свети Николе, Дебар, Велес, Скопје и Неготино
Одложено судењето за „Титаник“ за 12 август
Судечкиот совет, на денешното рочиште за случајот „Титаник“ на СЈО, во врска со изборните нерегуларности, одлучи судењето да биде одложено за 12 август.
Освен поранешниот премиер Никола Груевски, кој е во бегство, во „Титаник“ се обвинети и Кирил Божиновски, Миле Јанакиески, Гордана Јанкулоска, Билјана Бришкоска Бошковски, Илија Димовски, Мунир Пепиќ, Едмонд Темелко, Леко Ристоски, Кирил Тодоровски, Катерина Веловска, Станко Коруновски, Коста Марковски, Драгче Драгчески, Марјан Накевски, Гоце Јаневски, Џезми Ахмет, Роберт Давитков, Далибор Алешковиќ и Ленка Рашјаковска.
Охрид има рок до 1 февруари 2020 да се справи со дивоградбите
„Власта до 1 февруари 2020 да поднесе до Комитетот за светско наследство нов извештај за зачувување на имотот, за испитување од Комитетот за светско наследство на 44-та сесија во 2020 година, со можност, во случај да се утврди опасност на нејзината унверзална вредност, да се вметне во листата на Светско наследство во опасност“, одлучи УНЕСКО на 43. сесија што се одржува во Баку, Азејберџан.
Главното барање на УНЕСКО е прогласување на мораториум на секакви урбани трансофрмации на брегот на Охридското Езеро, но и на каква било урбанистичка трансформација. Комитетот на УНЕСКО и наМеѓународната Унија за конзервација на пририродата потсетија на нивните препораки уште од 2013 година.
Заев и министрите ќе добијат ветинг советник
Владата треба во рок од 30 дена откако ги доби препораките на ГРЕКО, да назначи лице за интегритет кое ќе ги советува премиерот, министрите и останатите вработени да носат правилни и издржани одлуки согласно законите, моралот и етиката и на начин на кој ќе го избегнат судирот на интереси и ќе ги одвојат јавниот и приватниот интерес, изјави денеска членот на Државната комисија за спречување на корупцијата, Владимир Георгиев.
Турската парламентарна комисија даде зелено светло за ратификација на Протоколот за пристап на РСМ во НАТО
Парламентарниот комитет за надворешни работи на Големото национално собрание на Турција даде зелено светло за нацрт-законот за Протоколот за пристапување на Република Северна Македонија во НАТО да биде ставен на дневен ред за ратификација, објави Анадолија.
