Заев телефонски му честитал на Мицотакис
Премиерот на Република Северна Македонија, Зоран Заев му ја честиташе победата на грчкиот колега Киријакос Мицотакис.
„Имав телефонски разговор со господинот Мицотакис, претседател на Нова демократија и нов премиер на нашиот сосед и пријател, Грција. Му честитав за победата на изборите и посакав просперитет и благосостојба на нашиот сосед Грција и на грчкиот народ. Заеднички изразивме надеж за продолжување на соработката меѓу Северна Македонија и Грција, во очекување на нашата прва средба како премиери. Ги потврдив позициите дека Грција е наш стратешки партнер со којшто развиваме соработка и градиме трајно пријателство и изразив благодарност за поддршката којашто од нашиот сосед ја добиваме за членството во НАТО и за почетокот на преговорите со ЕУ.
ОЈО со обвинение против Панчевски
Основното јавно обвинителство Скопје поднесе обвинителен предлог против поранешниот претседател на Основниот кривичен суд, Владимир Панчевски, за злоупотреба на службената положба и овластување за влијание врз начинот на електронската распределба на предметите што доаѓале во судот на одлучување.
Од ОЈО Скопје велат дека обвинетиот Панчевски со ставање на писмен параф од негова страна и со усно задолжување на вработени во судската писарница кои имале пристап во АКМИС системот, давал наредба да распределуваат конкретни предмети меѓу судиите надвор од времето на приемот на предметот во судот, како и насока на кој судија да се распредели предметот.
Пратеникот на ВМРО-ДПМНЕ, Манојловски нема да оди на работа оти полицијата му го претресувала возилото
Пратеникот Горан Манојловски, од ВМРО-ДПМНЕ во знак на револт ја напушти работата на Комисијата за труд и социјална политика, бидејќи полицијата му го претресувала возилото. По неговото заминување претседателката на Комисијата, Весна Пемова ја прекина седницата поради немање кворум.
Од МВР велат дека полициските службеници биле поставени на позиција на кружниот тек поради претходно извршено кривично дело, грабеж на банка во Сарај, од каде беа украдени околу 90 000 евра, при што се извршени проверки на повеќе возила меѓу кои и на пратеникот Манојловски, без притоа да знаат дека станува збор за пратеник. По извршената проверка му било дозволено да си оди без никакви проблеми.
Преку 2.000 потписи за иницијативата „Крај за расипништвото“
ЦИВИЛ денеска објави дека Иницијативата #КрајЗаРасипништвото до сега ја потпишале над 2.000 граѓанки и граѓани. Поточно, во моментот на објавување на оваа информација, својата поддршка ја дале точно 2.202 потписнички и потписници.
Организацијата на својата Фејсбук страница повика: „Споделете ја со своите пријателки и пријатели, разговарајте и коментирајте. Придонесот на секој поединец е од непроценлива вредност. ЦИВИЛ ви благодари за поддршката!“ Од Организацијата информираат дека следните чекори ќе бидат најавени во текот на месец август, а конкретни чекори ќе се преземат веднаш по завршувањето на годишните одмори на македонските народни избраници.
Д. Муратов