ВЕСТ НА ДЕНОТ: Комисијата за заразни болести бара нови рестриктивни мерки за градовите со најмногу заболени
Комисијата за заразни болести предложила, а Владата утре на седница ќе дискутира и ќе одлучува за евентуално враќање на рестрикциите на движењето, рече денеска министерот Венко Филипче.
Тој не спомена каков е конкретно предлогот за полицискиот час, но во јавноста е веќе објавено дека предлогот е враќање на полицискиот час во Скопје, Штип, Куманово и Тетово од 22 до 5 часот.
ИЗЈАВА НА ДЕНОТ
Филипче: Пикот е резултат на семејни и други собири од пред две недели
Овој пик е резултат на семејни и други собири од викендот на 23, 24 и 25 мај, односно од пред две недели, рече на денешната прес-конференција министерот за здравство, Венко Филипче, викендот кога муслиманскитe верници го славеа Бајрам, а православните празникот „Свети Кирил и Методиј“, кога имаше делумен карантин.
ВОНРЕДНА СОСТОЈБА
Во последните 24 часа се направени 702 тестирања, а регистрирани се 127 нови случаи на ковид-19. По градови: Скопје 67, Куманово 1, Дебар 1, Штип 33, Тетово 10, Струга 5, Охрид 6, Кочани 2 и Пробиштип 2.
*
На Клиниката за инфективни болести и фебрилни состојби почина пациент од Куманово на возраст од 70 години, хоспитализиран на 4 јуни и двајца од Скопје, пациент на возраст од 62 години, хоспитализиран од 5 јуни и пациент на возраст од 78 години, хоспитализиран на 2 јуни.
*
Денеска Институтот за јавно здравје регистрира 7 оздравени пациенти.
ФЛЕШ ВЕСТИ
Вицепремиерот Бујар Османи на денешната прес-конференција соопшти дека европската комисија во овие два дена ќе ја финализира првичната рамка за почеток на преговорите со Европската унија. До крајот на месецов, додаде Османи, во рамки на хрватското претседателство се очекува првата верзија, тоа е стандардна процедура, но означува голем исчекор.
*
До петок ќе се знае ставот на Владата за вонредната состојба кој заедно со мислењето на Комисијата за заразни болести за состојбата со пандемијата ќе бидат одлучувачки за датумот за одржување на изборите, изјави денеска вицепремиерот за европски прашања Бујар Османи.
*
Уште една од низата лажни вести и дезинформации беше објавена синоќа на социјалните мрежи Твитер и Фејсбук, дека СДСМ наводно дели прехранбени пакети за изборен поткуп на гласачи во Битола за време на полициски час. На снимката е прикажан службениот џип на Црвениот Крст од Битола и нивни волонтери како делат социјални пакети на загрозени семејства
СЛОБОДНА ЗОНА
„Во македонската политика сите се пазарат без употреба на средства за дезинфекција, ама ДУИ може мастер-класови на таа тема да им држи на другите, бидејќи во таа трка кон дното, моралните, идеолошките, безбедносните, бизнис и политичките репери секогаш се подготвени да ги спуштат подолу од кој било друг на „пазарот“, пишува Сашо Орданоски во денешната колумна – Ахмети без заштитни средства.
*
„Најдобро што може да прави во моментот главниот ковид-координатор е да престане да координира“, поентира Џевдет Хајредини – Кому да објасниш…
*
„За сите предвремени избори од 2008 година до денеска, освен за оние во 2016 година, индикативно е дека не постоеше ниту една од стандардните причини за организирање на предвремени избори. Во стандардните причини влегуваат изгласување на недоверба на владата, неможноста да се формира парламентарно мнозинство за да се избере влада или неусвојување од страна на парламентите на некои круцијални владини предлози, како што се буџетите или клучните реформски закони. Сепак, владејачките мнозинства се одлучуваа на предвремени избори со, барем, декларативна желба да го обноват политичкиот мандат заради поголем политички легитимитет“, пишува Александар Спасовски во анализата – Предвремените избори не се секогаш навремени избори.
