На прашањето како се дозволиле вакви разговори, Заев објасни дека се почитувани сите протоколи на поврзување, кога некој бара комуникација со премиерот и со други функционери. Според протоколот, како што рече, до него седи некој од советниците и прави записник од разговорот.
ДКСК ќе го разгледува случајот со Рашковски
Претседателката на ДКСК, Билјана Ивановска, денеска изјави дека ќе го разгледаат случајот со продажбата на авионски билети во институциите.
„Планираме да разговараме со Државниот завод за ревизија колку тие ќе го покријат тој случај. Значаен е затоа што големи парични средства се кријат во позадина и вреди за истражување“, додаде Ивановска.
Како одговор на новинарско прашање за тоа дали лицето што го откри случајот со владиниот генерален секретар Драги Рашковски е укажувач, Ивановска одговори дека лицето нема статус укажувач, бидејќи не ги испочитувал законските услови.
МТСП обезбеди летување на 700 деца од семејства во сецијален ризик
Министерството за труд и социјална политика и Црвен крст, обезбедија летување на 700 деца и нивни придружници од семејства во социјален ризик од цела држава, до крајот на летото во пет смени во одморалиштето „Мајски цвет“, Струга.
Оваа поддршка на МТСП и Црвен Крст е наменета за членови на семејства корисници на гарантирана минимална помош и детски и образован додаток, деца без родители и родителска грижа, деца со попреченост, односно корисници на посебен додаток до 26 години возраст.
МВР: Уништени над 600 парчиња оружје и над 400 килограми дрога
По повод Меѓународниот ден за уништување на огненото оружје во погоните на Еуроникел индустри во Кавадарци, беа уништени оружје и наркотични дроги одземени по основ на правосилни судски одлуки, донесени по завршени кривични постапки. Уништувањето на дрогата и оружјето го спроведе Министерството за внатрешни работи, Државната комисија за уништување на наркотични дроги, психотропни супстанци и прекурсори и Агенцијата за управување со недвижен имот.
Согласно претходно утврдени законски процедури, огненото оружје и наркотичните дроги претходно беа преземени од магацините на судовите и складирани во магацините на МВР, согласно Планот за преземање на мерки и активности за преземање, транспорт и складирање на огненото оружје и наркотички дроги, јавува МВР.
Собранието ја констатираше оставката на пратеникот на НДП, Весел Мемеди
Собранието на Република Северна Македонија на денешната седница ја констатираше оставката на потпретседателот и пратеник од НДП, Весел Мемеди.
Тој во обраќањето до пратениците ја обраложи оставката, посочувајќи на несериозен пристап кон НДП како мала партија и коалиционен партнер, но и нечесна политичка игра по завршувањето на промените во државата.
„Талир“ повторно одложен
Судењето за незаконско финансирање на партијата ВМРО-ДПМНЕ „Талир” се одложува за 12 септември, поради отсуство на еден од поротниците.
Процесот го води судијата Осман Шабани, а застапник на обвинението е Ленче Ристевска од СЈО.
Во судница беа присутни обвинетите Миле Јанакиески, спроведен од притвор, Кирил Божиновски спроведен од куќен притвор, како и пратеникот Илија Димовски и Леко Ристоски. На екс-премиерот Никола Груевски му се суди во отсуство.
Средби на Пендаровски во рамки на учеството на самитот на ПСЈИЕ во Сараево
Претседателот Стево Пендаровски, во рамки на учеството на самитот на Процесот за соработка во Југоисточна Европа, во Сараево оствари билатерални средби со претставници на земјите-учеснички на самитот. Пендаровски се сретна со претседателите на Албанија, Црна Горан, Босна и Херцеговина и Словенија.
На средбата со Претседателот на Република Албанија, Илир Мета, биле разменети мислења за севкупните билатерални односи меѓу двете држави, кои се пријателски и бележат позитивен развој со континуиран дијалог.
Дехран Муратов