На 25 мај 2016 година, уставните судии едногласно ги поништија двете одлуки за распуштање на Собранието донесени на 18 јануари и на 23 февруари 2016 истата година.
“Се поништува одлуката за распуштање на Собранието од 18 јануари и одлуката за изменување на одлуката за распуштање на Собранието од 23 февруари, 2016 година. Оваа одлука на Уставниот суд произведува правно дејствие од денот на донесувањето”, изјавила тогаш за Мета.мк генералната секретарка на Уставниот суд, Оливера Филиповска.
Со оваа одлука тогаш и официјално се стопираа сите активности поврзани со предвремените парламентарни избори закажани тогаш за 5 јуни 2016 година. На претходна седница одржана една недела пред таа одлука, уставните судии едногласно прифатија да ја разгледаат иницијативата поднесена токму од Демократската унија за интеграција (ДУИ), со која се оспорува распуштањето на Собранието.
Овој пат ДУИ не е за враќање на Собранието во функција, иако изборите се веќе одложени. За разлика од тогаш кога имаше политичка криза, сега земјава и официјално е во вонредна состојба, што и според Уставот е децидно причина за продолжување на мандатот на пратениците. Освен ДУИ тогаш за враќање на пратениците во Собрание беше и ВМРО-ДПМНЕ, и доволно им беше одлуката на Уставниот Суд за запирање на активностите за изборите. Дури и пред конечната одлука на Уставниот Суд, само при прифаќањето на иницијативата и носењето на времената мерка, тогашниот спикер Трајко Вељаноски свика седница на која пратениците едногласно го избришаа од Изборниот законик 5 јуни, како ден на кој треба да се одржат предвремените парламентарни избори.
Денеска кога земјава е во официјална вонредна состојба и тоа по втора одлука за дополнителни 30 дена, иницијативата за враќање на пратениците во собраниските клупи се успорува токму од ВМРО-ДПМНЕ и ДУИ. Актуелниот претседател на Собранието Талат Џафериуште не одговари на барањето на пратениците од неколку партии, а во 2016 година токму тој беше носител на иницијативата пред Уставен Суд со која Собранието пак ги отвори вратите.
А. Зеќири