Во пресрет на локалните избори, кандидатите за градоначалници во Скопје и околните општини презентираат проекти за инфраструктура, образование, спорт, култура и поддршка за младите и семејствата. Главните теми се зелените површини, спортските објекти, бесплатни услуги за ученици и поддршка на локалната економија и култура.
Ѓорѓиевски: Скопје ќе стане првиот целосно дигитализиран град, ослободување од комуналии за млади брачни парови до 40 години за изградба на куќи
Кандидатот за градоначалник на Скопје, од ВМРО-ДПМНЕ, Орце Ѓорѓиевски ја претстави дигитализацијата како еден од седумте столбови на својата програма, најавувајќи дека Скопје ќе стане првиот целосно „paper-free“ град во државата.
Со 17 проекти, ќе се дигитализираат сите процеси во градската администрација, Советот и јавните претпријатија, ќе се воведат е-услуги за граѓаните и бизнисите, „Смарт центар“, „Дигитален близнак на Скопје“ и SKOPJE CITY GO картичка за интегрирани услуги.
Во делот за младите, Ѓорѓиевски најави целосно ослободување од комуналии за млади брачни парови до 40 години без имот, младинска квота за вработување, центар за кариера, субвенции за занаетчии, „Disco Zone“ за ноќен живот и „Паметен пазар на недвижности“.
Шукова: Зелен кеј и модерни вело рути во Ѓорче Петров
Каја Шукова, кандидатка за градоначалничка на Скопје од СДСМ, најави уредување на кејот во Ѓорче Петров со современи пешачко-велосипедски патеки, зелени јавни простори и континуирана урбана врска со соседните општини.
„Ѓорче Петров ќе стане дел од зелена оска низ градот, со јавни простори достапни за сите генерации“, рече Шукова.
Касами: Инвестиции во спортот во Тетово
Градоначалникот Биљал Касами најави целосна реконструкција на градскиот стадион и изградба на спортски комплекс со повеќе терени, мултифункционални спортски сали и нов стадион во Сараќино.
„Во наредните четири години, инвестициите во спортот ќе ја надминат вредноста од 16 милиони евра“, истакна Касами.
Меџити: Бесплатни униформи и дневни оброци за учениците во Чаир
Кандидатот за градоначалник на Чаир од ВЛЕН, Изет Меџити, најави бесплатни униформи за сите ученици и дневни оброци за децата од социјално загрозени семејства.
„Инвестираме во нашите деца, затоа што инвестираме во иднината на Чаир“, рече Меџити, додавајќи дека ќе се воведат и нови мерки за безбедност во училиштата.
Лукровски: Градинки и модерни училишта во Карпош
Сотир Лукровски, кандидат на ВМРО-ДПМНЕ, најави изградба на нова детска градинка и целосна реконструкција на постоечките градинки и училишта. Ќе се постават фотоволтаици за намалување на зависноста од мазут и загадувањето.
„Вистинска силна општина се гради преку образованието и грижата за децата“, нагласи Лукровски.
Герасимовски: Двојно зголемен буџет за култура во Центар
Градоначалник на Центар, и кандидат на СДСМ, Горан Герасимовски, истакна дека буџетот за култура е зголемен од 13 на 26 милиони денари. Општината вложува во мурали, концерти и настани за афирмација на македонската култура и уметници.
„Поддршката на македонските автори и уметници останува врвен приоритет“, рече Герасимовски.
Лабудовиќ: Поддршка за млади и креативни бизниси во Центар
Мирослав Лабудовиќ, кандидат на Движењето ЗНАМ, најави формирање Фонд за поддршка на младите претприемачи и креативни бизниси, модернизација на пазарите и отворање на јавни простори за локални бизниси.
„Центар треба да стане пример за иновативна и динамична општина“, истакна Лабудовиќ.
Османи: Реновирање на фасадите во стариот Чаир
Бујар Османи, кандидат на Националната унија за интеграција, најави проект за санација на фасадите во стариот Чаир со европски средства.
„Овој дел од Чаир ќе биде целосно уреден и заштитен – без дивоградби“, рече Османи, додавајќи дека проекти за лифтови и енергетска ефикасност ќе започнат веднаш по изборите.
Рунтевски: Проект за заштита на Беровското Езеро и воведување SCADA систем за водоводната мрежа
