пишува: МИРЈАНА НАЈЧЕВСКА
Доколку во Собранието на Македонија имаме пратеници, а не партиски марионети и случајно залутани ликови, тие можат да направат многу работи без да ги менуваат законите, Деловникот или било кој пропис со кој се регулира нивната работа.
Да ја спроведат во пракса одредбата дека Собранието е во постојано заседание и да почнат да одат на работа (наместо да си бркаат партиски, министерски и други работи).
Да побараат изработка на план за постојано заседание на Собранието во услови на пандемија.
Да го искористат периодот на намалена активност на Собранието за завршување на сите административни работи поврзани со вршење на функцијата.
Да се запознаат со Собранието, неговата структура, сите служби и посебно со библиотеката на Собранието наместо да импровизираат и да се чудат што да прават со себе и со функцијата која ја имаат.
Да иницираат вработување на преведувачи кои го знаат македонскиот јазик (наместо неписмените преведувачи кои го унакарадуваат јазикот).
Веднаш да изберат претседател на Собранието (наместо да чекаат како ќе завршат партиските поделби на колачот, односно местото претседател на Собранието да е составен дел од поделбата на колачот). Според член 22 од Деловникот на Собранието, кандидат за претседател може да предложат 20 пратеници.
На собраниската зграда да постават електронска табла на која ќе се гледа присуството на пратениците и нивната активност на собраниските седници и во комисиите во кои членуваат.
Да побараат сите информации и материјали да ги добиваат во електронска форма со цел заштеда на хартија.
Писмено да се откажат од имунитетот освен за кажаното во Собранието и во врска со работата на Собранието (со што ќе можат да бидат спроведени судски постапки во случај на ширење говор на омраза, дискриминација и штетен говор).
Да ги стават на дневен ред за разгледување сите уредби со законска сила кои се донесени во изминатиот период од страна на Владата.
Да започнат средби со цел избор на работните тела.
Да воспостават канали на електронска комуникација со граѓаните (е-мејли отворени за секој граѓанин и посебно за избирачите од конкретната изборна единица, ФБ и твитер профили на кои ќе може да се коментира, … јавно објавени и достапни за сите).
Така прават сериозните пратеници, а не партиските марионети и претставниците на шоу-бизнисот.
Сите права се задржани. ЛИНК: Услови за користење, авторски права и заштита на приватноста. Тесктот е личен став на Авторката.
