ЦИВИЛ Медиа разговараше со градоначалникот на Велес, Аце Коцевски, во поглед на европските перспективи на Северна Македонија, придонесот кон евроинтеграциите на самата општина, како и за очекувањата од локалните избори.
ЦИВИЛ: Која е Вашата оценка за политичките состојби и процеси по предвремените парламентарни избори кои се одржаа во јули?
Коцевски: Се надевам дека како ќе расне демократската свест и култура ќе се зголемува бројот на граѓаните со вистински европски и демократски вредности, дека ќе знаат што е вистинска вредност, а што фалш вредност спакувана во некоја демократска обланда за заштита на некои права и така натаму. Најкарактеристичен пример е тоа што никој не го очекуваше, односно малкумина го очекуваа, големиот број гласови кои ги доби политичката партија Левица. Јас очекувам во наредниот период таа партија да расне, а не да спласнува ако се следи какви се реакциите на социјалните мрежи, дали општеството ќе најде соодветен одговор да ги разобличи тие работи, допрва треба да видиме. Прв тест ќе бидат престојните локални избори. Мислам дека има политичари и политички партии кои свесно одат кон тоа да ги придобиваат на жешки социјални, национални теми разочараните и од левицата и од десницата и на тој начин создаваат голем контигент на гласачи што може да биде изразено и по број на пратеници и на советници во идните мандатни периоди, многу клучни во конституирањето на идните општински совети и на парламентарното мнозинство.
ЦИВИЛ: До локалните избори има околу една година. Кои се Вашите прогнози? Што останува, еве во Општина Велес да се сработи и дали би се кандидирале за уште еден мандат за градоначалник на Општината?
Коцевски: Да ја расчистам дилемата првин околу мене. Јас нема да се кандидирам за следните локални избори. Јас не бев кандидат и на минатите локални избори во внатрешната постапка која се водеше во рамки на СДСМ, од лични прични. Но, анкетите што ги правеле во партијата покажаа дека имам убедлива доверба во споредба со другите можни кандидати и од тие прични на молбата прифатив да бидам повторно кандидат со цел да ги добиеме изборите. Се надевам дека сега ќе израснеме нови кандидати кои ќе бидат добри и ќе успеат да ја добијат довербата на граѓаните.
Мислам дека ќе бидат тешки претстојните локални избори. Јас припаѓам на владејачката мнозинска партија. Мора да бидеме реални на минатите избори поради вкупниот контекст во општеството и сè што се случуваше со Шарената револуција и киднапираното општество, загорзената демократија, сето тоа што го правеше претходната гарнитура на власт, ни одеше во прилог и успеавме неочекувано исклучително голем, да не речам огромен број на градоначалнички места во државата. Нереално е да го очекуваме тој, иако е посакувано да се повтори, резултат. Тоа не треба да се смета за пораз. Треба да направиме максимум што можеме во овој период што преостанува за да имаме образ, што се вели, да излеземе пред граѓаните и повторно да ја побараме нивната доверба.
ЦИВИЛ: Како локалната самоуправа во Велес се подготвува за интеграција во ЕУ? Колку и на кој начин се почитуваат европските вредности? Коцевски: Мислам дека Велес е во добра состојба од било кој аспект да се гледа. Мислам дека сме и лидери во некои области, зачетници сме на некои нови идеи користејќи ги европските искуства. Сакам да се пофалам дека Велес е прва општина што донесе стратегија за развој на Велес како паметен град според европските директиви. Први донесовме план за одржлива урбана мобилност по директивите на ЕУ. Вмрежени сме во некои европски организации од каде полесно можеме да ги преземеме тие идеи и искуства. Мојата мисија е во наредниот период тоа да го наметнам врз централните власти и кај другите градоначалници да го стават да биде важен приоритет со нивните дејствувања.Добри сме со обезбедувањето на средствата од европските фондови толку колку што ни се на располагање. Во моментот се реализираат два значајни проекти кои се финансирани предпристапните фондови на ЕУ. Очекуваме и резултати од две апликации кои очекуваме да ги добиеме во наредниот период.
Се обидуваме да негуваме вистински вредности, да работиме вистински, а не само декларативно според европските принципи. Дури ако сакате да правите анализа, од ова што сега го најавува Владата да се редуцира бројот на вработени во општинската администрација, Велес ви е еден прекрасен пример за тоа. Ако кажам дека Велес има ист број на жители како неколку репер општини, ние имаме стотина вработени, а тие имаат дури и со двеста и повеќе дури и четиристотини вработени. Мојата филозофија е во општините да има оптимален број на вработени, а администрацијата да биде мала, стручна, непартиска, неполитичка, професионална и добро платена. А парите што другите ги даваат плати на административни службеници да останат за капитални проекти со кои ќе го подобриме квалитетот на животот на граѓаните.
Со давање на плати на заслужни партиски кадари ние не можеме да одиме напред и да го подобруваме квалитетот на живеење. За жал во Македонија имаме осстојба во која различен е степенот на богатство на општините и не можеме да ги мериме успесите на градоначалниците според тоа колку тие направиле затоа што има некои што се екстремно богати, не знаат што да им прават на парите, неколку скопски општини, Град Скопје и неколку други општини што се издвојуваат со рудници со минерални суровини, добиваат огромни пари од концесиите за користење на минералните суровини. Јас сакам да ги вреднувам градоначалниците по тоа колку тие прават од можноста што им стои на располагање. Тука треба да се видат нивните вештини – со малку пари колку можат да направат. Лесно е со многу пари да бидете успешен градоначалник. Проблем е ако немате многу пари како да извлечете максимум од можното и да го подобрите квалитетот на живеење на граѓаните.
