За сите вакцини и лекови водиме сметка да се соодветно испитани и да ги имаат соодветните сертификати за квалитет и да се потврдени од регулаторните тела, изјави вчера министерот за здравство Венко Филипче, во емисијата 24 Анализа.
Министерот Филипче, со доза на воздржаност најави дека очекува вакцините од Астра Зенека да стигнат на 31 март и 15 април, додека кинеските вакцини на 31 март, нагласувајќи дека системот е подготвен и точно се знае како ќе се одвива вакцинирањето.
Во однос на ставот на Европската агенција за лекови дека вакцината на „Астра Зенека“ е безбедна, министерот Филипче посочи, дека во однос на оваа вакцина посебно водат сметка и за тоа што го кажуваат националните агенции во ЕУ, кои времено го запреа вакцинирањето и ги следат сите релевантни истражувања.
Неколку случаи, посочи Филипче, излегоа во изминатиот период и тоа придонесе да се создаде сомнеж.
– Националните агенции на земјите каде што имаше несакани ефекти од вакцината преземаа мерки на претпазливост и времено го запреа вакцинирањето со „Астра Зенека“. Што е нормално, да бидат внимателни и да се утврди ако има причинско последична врска. Релевантна институција за тоа е Европската агенција за лекови, која излезе денеска со став дека дефинитивно не станува збор за компликации, заради кои што треба да се прекине или ствараат сомнеж. Дефинитивно вакцината е безбедна и нема причинско последична врска со овие случаи и верувам дека имунизацијата ќе продолжи, изјави Филипче.
За тоа зошто не е вакциниран, министерот Филипче, повтори дека лично ќе се вакцинира тогаш кога ќе стигнат поголемите дози вакцини.
– Регионалниот директор на СЗО Клуге вчера го потврди тоа дека уште на почетокот сме работеле заедно да го подготвиме нашиот систем и тој е целосно спремен. Меѓутоа се случи да се одложат два механизми, за кои голем број земји веруваа дека може порано да стигнат вакцините. Сега имаме повторно најава, но ќе го кажам со доза на резерва. Дозите ќе стигнат на 31 март и 15 април. Вкупно 100 илјади, но сепак и тие го кажуваат тоа со доза на резерва. Ова ќе биде количина од вакцина на Астра Зенека. И кинеските вакцини, според најавите, ги очекуваме до 31 март, изјави Филипче.
Според директорот на Институтот за имуно биологија Александар Петличковски, бројките за вакцината на Астра Зенека се многу убедливи и заклучокот на Европската агенција за лекови е до некаде очекуван.
– На вкупно 17 милиони дадени дози од вакцината на „Астра Зенека“ се пријавени 37 несакани ефекти во форма на некаква тромботична случка. Тоа прави една фреквенција што е помала отколку фреквенцијата во општа популација, изјави Петличковски.
Несаканите појави кои се еден на милион, нагласи тој, мора да ги споредуваме со три случаи на 100 кои умираат од корона во нашата земја.
– Имаме 115 илјади детектирани случаи на корона и над три илјади мртви. Што прави околу три на сто мртви. За овие несакани ефекти еден, десет на милион нема простор за паника, но заслужуваат сериозни проверки, изјави Петличковски.
Директорка на Инфективна Милена Стевановиќ, рече дека пред многу кратко време ја поминала болеста, но дека ќе се вакцинира со „Астра Зенека“, во првиот момент кога ќе дојде за вакцинација.
-Мораме да имаме доверба во нашиот систем. Јас ја имам, не само затоа што работа во него. Се потешко ќе ни биде во секоја идна и сегашна ситуација, ако не веруваме во она што го прави здравствениот систем. Верувам дека, многу малку верувале и очекувале дека ќе се носиме со работите вака како што се носиме, а јас сметам дека многу професионално и многу добро се носиме, изјави Стевановиќ.
