-Настаните поврзани со Шарената револуција, по мое мислење, го сменија текот на историјата на нашата држава, го сменија правецот по кој што се движеше политичката криза, и мислам дека тоа беше точката која ја прелеа чашата кај сите, или кај огромен број граѓани по повод режимот на Груевски. Да не заборавиме што беше поводот, за Шарената револуција, тоа беше потпишувањето на масовната аболиција за сите оние коишто беа под некаква истрага, или што имаа некаков случај од поранешното Специјално јавното обвинителство. Чинот на аболиција, или желба, со политички акт да се укине борбата за правда и слобода беше повод луѓето масовно да излезат на улиците, изјави министерот за правда Бојан Маричиќ, на одбележувањето на Пет години Шарена револуција, во организација на ЦИВИЛ.
-И тоа никогаш не треба да го заборавиме, која беше намерата на режимот на Груевски, преку тогашниот претседател Иванов да го направи тоа што го направи. Мислам дека тој чин имаше сериозни последици, тие последици ги чувствуваме и до ден денес, но мислам дека токму затоа е важно, тоа што граѓаните се спротивставија отворено, видливо и долготрајно на тој чин.
Пет години подоцна, да ја погледнеме листата на главните луѓе на режимот, каде биле тогаш, а каде се денес, без да навлегувам во поединечни имиња, меѓутоа, сите сме свесни за тоа каде се денес најмоќните луѓе од тоа време. Кој е во затвор, кој е во притвор, кој е во бегство, и тоа е придобивка на нашиот систем, на какво-такво независно судство, иако сме далеку од идеално, далеку сме од ситуацијата во којашто би требало да бидеме. Дали е доволно тоа што е направено, секако многумина ќе кажат – не, меѓутоа мислам дека и тоа како е направено до сега, во однос на тоа. Сигурен сум дека би биле сите позадоволни кога случаите од поранешното Специјално обвинителство би биле расчистени порано, или некои од тие не би биле блиску до застарување, меѓутоа не можеме да се враќаме назад, и верувам дека судството во рамките на своите одговорности и надлежности, ќе си ја заврши својата работа, што и беше целта, на нашиот ангажман во тој период.
Со Законот за Јавно обвинителство којшто беше донесен минатата година, се превенираше стопирање и затворање на случаите на поранешното СЈО, во меѓувреме, мислам дека дел од оние луѓе што беа симбол на заробената држава и заробеното судство не се повеќе во тој систем, така што мислам дека во тој дел, навистина треба да се признае дека значаен дел од работите за коишто се протестираше, е успешно завршен, со заеднички потфат на целото општество, на сите институции, и со поддршка од граѓаните.
обработка на текст: Дијана Тахири
монтажа: Ариан Мехмети
