ВЕСТ НА ДЕНОТ
Едштадлер: Немам разбирање за блокадата од Бугарија и апелирам истата да ја тргне
Северна Македонија е кандидат за пример и сакам јасно да порачам за време на португалското претседателство брзо да се финализираат преговарачките рамки за првата конференција. Се што е одложување понатаму ќе не остави да бидеме губитници. Искрено велам, дека немам разбирање за тоа дека Бугарија понатаму блокира.
Ова денеска го порача австриската министерка за Европа и Устав Каролине Едштадлер, на заедничката прес-конференција во Виена со вицепремиерот за европски прашања Никола Димитров.
Едштадлер посочи дека Северна Македонија е кандидат за пример и оти дури го смени и името за да постигне вистински чекори кон Европа, потсетувајќи дека под германското претседателство се вложија огромни напори за да се реши бугарската блокада, но тоа не успеа.
-И понатаму станува на врвот на агендата и во Советот и на ниво на министрите за надворешни работи да се реши оваа блокада. Апелирам до Бугарија, овој отпор да го заврши. Ние понудивме во Виена како неутрално место да продолжат разговорите. Досега оваа понуда не беше прифатена, но сакам јасно да кажам дека настанува вакуум ако оваа перспектива на пристапување не ја реализираме во дела.
Тој вакуум, додаде Едштадлер, ќе биде пополнет со други земји што сакаат да извршат влијанија, како Кина, Русија.
-На Западниот Балкан сакам спротивното да го постигнеме и особено Северна Македонија да ја вклучиме во идната конференција. Западниот Балкан припаѓа во Европа. Се додека Западниот Балкан се гледа како член и дел од европската перспектива и ЕУ нема да биде комплетна без него, истакна Едштадлер.
ИЗЈАВА НА ДЕНОТ
Царовска: Квалитетно образование значи силна држава
Центарот за управување со промени (ЦУП) денеска на онлајн-конференција ги презентираше електронските услуги изработени во соработка со министерствата за образование и наука и за информатичко општество и администрација, во рамки на проектот „Дигитализација во јавниот сектор во РСМ за непречено функционирање“. Проектот е финансиран од Владата на Обединетото Кралство и поддржан од Британската амбасада во Скопје.
Конференција се реализира во рамките на проектот кој имал за цел а ги поддржи институциите во дигитализација на образованието. Целта на проектот е да се презентираат услугите во дигитализацијата.
„За нас како министерство дигитализацијата е приоритет. Квалитетно образование значи силна држава. Сметам дека сите земји кои не се дигитализираат, заостануваат. И образовниот процес може многу брзо да се дигитализира. Дигитализацијата и воспоставувањето на канал помеѓу наставник и ученик за нас претставуваше отскочна даска во дигитализацијата на образованието со помошта на ФИНКИ, кои навистина брзо и ефикасно го воспоставија каналот на комуникација“ рече министерката Царовска.
СКЕН – политички видео магазин: На „балот“ за човековите права на Ромите
Ром(к)ите честопати се мета на најразлични предрасуди и осуди од општеството, истовремено заборавени од институциите и политичарите, кои се посетувани единствено во време на предизборието или на Меѓународниот ден на Ромите – 8 април. Кој ги тркала Ромите сите овие години наназад? Што е со сите (празни) ветувања? До кога ќе започнуваме процеси на нивна интеграција во општеството на кои крајот не им се гледа? Секој ден граѓан(к)ите поминуваат покрај графитот „шудро манге (sudro mange) во Скопје ретко кој знае дека на ромски значи – ладно ми е. На „балот“ за човековите права на Ромите е тема на ова издание на политичкиот видео магазин – СКЕН.
ЦИВИЛНИ АКТИВНОСТИ
ЦИВИЛ најостро го осудува однесувањето на одредени политички и други структури во земјава во случајот со кочанско Трајаново Трло во кој се препознатливи крајниот расизам и националистичко дивеење. Без оглед на „страната“ од која доаѓаат деструктивните појави во општеството и на политичката сцена, без оглед на тоа дали се работи за политички, етнички или верски мотивирани инциденти, тие не може и не смее да се оправдаат и премолчат.
Во денешното соопштение за континуираните клевети, лаги и навреди, ЦИВИЛ ги повикува лицата кои коментираат на социјалните мрежи да не манипулираат со фактите и да се воздржат од навредлив и вулгарен говор. „Во коментарите на одделни содржини, поединци изнесуваат чисти измислици и лаги. Заднината на коментарите се очигледни и добро познати“ – се вели во соопштението на оваа организација за човекови права.
ФЛЕШ ВЕСТИ
ОБРАЗОВАНИЕ Центарот за управување со промени (ЦУП) денеска на онлајн-конференција ги презентираше електронските услуги изработени во соработка со министерствата за образование и наука и за информатичко општество и администрација, во рамки на проектот „Дигитализација во јавниот сектор во РСМ за непречено функционирање“.
КОВИД-19 Благо намалување на бројот на новозаболени од Ковид-19 се бележи во државава, a досега се вакцинирани близу 30.000 граѓани.
Министерот за здравство Венко Филипче нема да нарачува дополнителни дози вакцини од Институтот за вирусологија и серуми „Торлак“ од Србија која ќе ја произведува руската вакцина Спутник В, ниту од било кој друг произведувач, бидејќи како што рече веќе се обезбедени 2 милиони и 600 илјади дози.
Трпение побара министерот за здравство Венко Филипче за сите вработени во критичната инфраструктура, напоменувајќи дека само дел од вработените во овие дејности досега се вакцинирале, но оти како што ќе стигнуваат новите вакцини така ќе се прошири процесот на имунизација за сите вработени во тие сектори.
Продолжувањето на сегашните рестриктивни мерки по 20 април ќе зависи од епидемиолошката состојба и индикаторите кои се следат при носењето на одлуките за нивно воведување.
ПОЛИТИКА Сојузничките сили на НАТО од 1 мај започнуваат со повлекување од Авганистан. Ова е одлуката на состанокот на министрите за одбрана и надворешни работи на НАТО на кој учествуваа министрите Бујар Османи и Радмила Шекеринска.
Западен Балкан е од стратегиска важност за ЕУ, а проширувањето на Унијата и Западен Балкан ќе бидат меѓу клучните приоритети на словенечкото претседавање со Советот на ЕУ во втората половина на 2021 година.
ЛАЖНИ ВЕСТИ Министерот за здравство Венко Филипче целосно ги демантира наводите за исплатени милион евра за респиратори од Бразил како што објавија дел од медиумите. Тој побара од Инфомакс, Курир, Нетпрес и сите кои ја шират лагата на ВМРО-ДПМНЕ итно да ги повлечат текстовите со кои ја лажат јавноста дека некој злоупотребил народни пари.
Во денешното соопштение за континуираните клевети, лаги и навреди, ЦИВИЛ ги повикува лицата кои коментираат на социјалните мрежи да не манипулираат со фактите и да се воздржат од навредлив и вулгарен говор.
ИНТЕГРАЦИИ Заменик-претседателот на Владата Никола Димитров денеска ќе престојува во работна посета на Виена која е дел од турнејата на вицепремиерот на главни градови на земји членки на ЕУ.
ОПШТЕСТВО Платформата за родова еднаквост преку регионално соопштение за сексуалното насилство и вознемирување на жените на интернет, потпишано од 138 организации од Балканот, го адресира проблемот за постоењето на „Телеграм групи“ во кои се вознемируваат жени во земјите на поранешна Југославија, кои и понатаму остануваат незаштитени од институциите на државите.
Министерството за Одбрана ко-домаќин на меѓународната онлајн дебата за сајбер безбедноста на Западен Балкан
ПРАВДА За проектот за изградба на домови за стари лица требаше да платиме 350 илјади евра во готово и 16,1 милион денари на фактура, кажа бизнисменот Ресул Лога, сведочејќи на судењето за невладината организација „Меѓународен сојуз”, каде заедно со основачот Бојан Јовановски, обвинети се уште четири лица.
Конфедерацијата на слободни синдикати (КСС) денеска од 16 часот ќе одржи протест со автомобили со кој ќе го искаже незадоволството од немањето социјален дијалог, непочитувањето на работничките права и последното зголемување на минималната плата.
Групата на држави против корупцијата (ГРЕКО) на Советот на Европа, при претставувањето на својот дваесет и прв извештај за работата, повикува да се спречат ризиците од корупција како дел од мерките преземени за борба против економските последици од пандемијата на Ковид-19.
И. К.
